སློབ་དཔོན་སྣ་ཚོགས་གཟུགས་ཅན།

(སྤྲིན་གྱི་རྒྱ་མཚོ་བརྒལ་བའི་བརྩེ་དུང་ཞེས་བྱ་བ་འདི་ལ། ཕྱི་འཇིག་རྟེན་བརྩེ་འདང་གི་གཏམ་རྒྱ་མེད་དང་། ནང་གསང་སྔགས་བཏུལ་ཞུགས་ཀྱི་སྤྱོད་པའི་གཏམ་མེ་ཏོག་གི་རྒྱ་ཅན་གཉིས་ལས། འདིར་བཀོད་པ་ནི་ཕྱིའི་གཏམ་ཡིན་ཞིང་། ནང་གི་གཏམ་ནི་ཁོ་བོའི་གསང་བའི་རྣམ་ཐར་གྱི་མཛོད་དུ་ཡོད་པས། རིགས་དང་། ཐོས་པ་དང་། ཤེས་རབ་དང་། གདམས་ངག་གི་བརྒྱུད་པ་གཅིག་མི་གཅིག་ཀུན་གྱི་སྤྱན་ལམ་དུ་འབུལ་བར་རྔོ་མི་ཐོགས་སོ།།)
ངག་གི་འདོད་འཇོ་དཔལ་ལྡན་ལྷ་མོ་དབྱངས་ཅན་མ་ལ་ཕྱག་འཚལ་ལོ།། དེ་ཡང་ཕྱི་ལོ་༢༠༡༠ཟླ་དྲུག་(21st June 2010)པའི་ཚེས་༢༡ཉིན་གྱི་ཐོ་རངས་ལ། སློབ་དཔོན་ཆེན་པོ་པདྨ་འབྱུང་གནས་ཡིན་ཟེར་བའི་རྣལ་འབྱོར་བ། བོད་ལུགས་ཀྱི་སྔགས་ཆས་ཅན་ཞིག་སླེབས་ནས་ངའི་ལག་པ་གཉིས་ཀྱི་ནང་དུ་ཟླ་བ་ཆུང་ཆུང་འོད་འཚེར་བ་ཞིག་བཞག་པ་རྨིས་ཤིང་། དེའི་རྐྱེན་ཀྱིས་ལུས་དང་སེམས་ལ་དགའ་བདེའི་ཚོར་སྣང་བསམ་གྱིས་མི་ཁྱབ་པ་ཞིག་སྐྱེས། ཞོགས་པར་མལ་ལས་ལངས་སྐབས་དེ་རིང་སྐད་ཆ་སྙན་མོ་ཞིག་གམ། ཡང་ན་དོན་ཡག་པོ་ཞིག་དང་འཕྲད་རྒྱུ་ཡོད་པར་ཡིད་ཆེས་བྱས་ཀྱང་དོན་ཅི་ཞིག་ཡིན་ནི་མ་ཤེས། སྐབས་འདིར་ངས་སྔ་འགྱུར་རྒྱུད་འབུམ་རིན་པོ་ཆེར་དཀར་ཆག་འབྲི་བཞིན་པའི་སྒང་ཡིན་པས། ཉིན་གང་པོར་ཀུན་བྱེད་རྒྱལ་པོའི་རྒྱུད་སོགས་བཀླགས་ཏེ། དགུང་མོའི་ཆུ་ཚོད་དགུ་པ་ཡར་མར་ཞིག་ལ་ངལ་གསོའི་གོ་སྐབས་དང་བསྟུན་ནས་ངོ་དེབ་(Face book)ཀྱི་ནང་དུ་འཛུལ་བས། ངོ་དེབ་ཀྱི་གླེང་མོལ་ཁང་(chat room)གི་ནང་ནས་ཆོས་སྐྱིད་དབང་མོ་ཟེར་བའི་བུ་མོ་ཞིག་གིས་ཧ་ཡེ་ཟེར། བུ་མོ་འདིའི་ངོ་དེབ་ཀྱི་(profile)ཐོག་ཏུ་སྟོད་གོས་ཟིང་སྐྱ་ཞིག་གྱོན་ཞིང་། ལག་པ་གཉིས་ཀྱིས་མཁལ་མ་སྐྱོར་བཞིན་ཆུ་འགྲམ་ཞིག་ཏུ་ཡོད་པའི་པར་བྱེད་སྤྱོད་བྱས་འདུག

ངས་ནམ་རྒྱུན་གླེང་མོལ་ཁང་གི་ནང་ནས་འབྲེལ་བ་བྱེད་མཁན་རྣམས་ལ་ཞིབ་འཇུག་མ་བྱས་པར་ཡ་ལན་སྤྲོད་ཀྱི་མེད། དེར་བརྟེན་ཐོག་མར་མོའི་པར་མཛོད་ཀྱི་ནང་དུ་སོང་ནས་པར་རྣམས་ལ་བལྟས་པས། བུ་མོ་དེ་འབྲུག་ནས་ཡིན་པ་དང་ཁྱིམ་ཐབས་བཟུང་མེད་མཁན་ཞིག་རེད་འདུག མོའི་ངོ་དེབ་ནང་གི་པར་རྣམས་མཐོང་བས། སྐད་ཅིག་དེ་ལ་ལས་ཀྱི་འཕྲོ་སྨིན་པ་ལྟ་བུར་ངའི་གློ་སྙིང་བྲང་གསུམ་ཡོངས་རྫོགས་མོའི་ཕྱོགས་སུ་ཤོར། དེར་ངས་ཀྱང་ཕར་ཧ་ཡེ་ཞེས་བྱས་པས། ཁོ་མོས་ཁྱོད་རིན་པོ་ཆེ་དངོས་གནས་ཞིག་ཡིན་ནམ་ཡང་ན་མིང་ལ་རིན་པོ་ཆེ་ཟེར་བ་ཡིན་ཟེར། ངས་ཁྱོད་ཀྱིས་ང་ལ་དྲི་བ་དཀའ་ལས་ཁག་པོ་ཞིག་བཏང་སོང་ཞེས་བརྗོད་པ་ཡིན། མོས་ག་རེ་བྱས་ནས་དྲི་བ་འདི་དཀའ་ལས་ཁག་པོ་ཆགས་སོང་ཟེར། ངས་ང་རིན་པོ་ཆེ་དངོས་གནས་ཤིག་མིན་ཟེར་ན་ནི་ངའི་རྩ་བའི་བླ་མ་རྣམས་ཀྱིས་ང་རིན་པོ་ཆེ་རེད་གསུངས་ནས་ངོས་འཛིན་གནང་བ་རེད། ང་རང་ཡང་རིན་པོ་ཆེའི་ལམ་ཁར་འགྲོ་གི་ཡོད། ང་རིན་པོ་ཆེ་དངོས་གནས་ཤིག་ཡིན་ཟེར་དགོས་ན་ནི་རང་གིས་རང་ལ་ཟེར་མ་ཤེས་པ་ཞིག་འདུག དེར་བརྟེན་དྲི་བ་འདི་དཀའ་ལས་ཁག་པོ་ཞིག་རེད་ཅེས་བཤད་པ་ཡིན། མོས་ཧེ་ཧེ་ཟེར། དེ་ལྟར་ཉིན་དེར་ངེད་གཉིས་ཐོག་མར་ངོ་ཤེས་ཤིང་། ཉིན་དེ་ནི་སློབ་དཔོན་ཐུགས་རྗེ་ཅན་ཨོ་རྒྱན་མཚོ་སྐྱེས་རྡོ་རྗེའི་འཁྲུངས་སྐར་གྱི་ཉིན་མོ་རེད། དེའི་ཉིན་མོར་འབྲུག་ཡུལ་ནས་ཀྱང་ཨོ་རྒྱན་རིན་པོ་ཆེའི་འཁྲུངས་སྐར་ཀྱི་ཉིན་ཡིན་པས་མོས། དེ་རིང་པདྨ་སཾ་བྷ་ཝའི་འཁྲུངས་སྐར་ཡིན་པས་ང་ཞོགས་པ་སྔ་པོར་ལངས་ཏེ་ལྷ་ཁང་དུ་མཆོད་མཇལ་ལ་ཕྱིན་ནས་ཕྱིར་ཁྱིམ་ལ་ཐོན་མ་ཐག་ཡིན་ཟེར། སྐབས་དེར་ཁོ་བོ་རང་གི་སྙིང་དུ་སྡུག་པའི་ཆུང་མས་གསོན་བསྐྱུར་བྱས་ནས་ཟླ་དྲུག་ལྷག་འགོར་བའི་རྗེས་ཙམ་ལ་རེད།
དེ་ནས་བཟུང་ཉི་མ་རེ་རེ་བཞིན་བུ་མོ་འདི་དང་ཐེངས་གཅིག་མ་ཐུག་ན་ཉིན་དེར་ལས་དོན་གལ་ཆེན་ཞིག་མ་ཚང་བའི་བསམ་བློ་བྱུང་ཞིང་། ངེད་གཉིས་ཀྱིས་བདུན་ཕྲག་གཉིས་ཙམ་ལ་ཉིན་རེ་བཞིན་དྲ་ཐོག་ནས་ཡུན་རིང་རེར་ཁ་བརྡ་བྱེད་ཀྱི་ཡོད་ཀྱང་བརྩེ་དུང་གི་སྐོར་ནི་ཚིག་གཅིག་ཀྱང་བཤད་ཀྱི་མེད། ཚུར་ཡང་དེའི་སྐོར་ནས་ཟུར་ཙམ་གླེང་གི་མི་འདུག དེའི་རྒྱུ་མཚན་ནི་ང་ལ་འདི་ལྟ་བུའི་བུད་མེད་ལོ་ཆུང་དང་། སྐྱེ་ཡག་ཅིག་ལ་བརྩེ་དུང་གི་སྐོར་གྱི་སྐད་ཆ་བཤད་རྒྱུའི་བློ་ཁོག་མེད་པས་རེད། དངོས་གནས་བཤད་ན་ངས་རང་གི་བཟའ་ཟླ་ལ་རང་གི་སྲོག་ལས་ལྷག་པའི་གཅེས་སྐྱོང་བྱས་པས་རྒྱ་བོད་གཉིས་སུ་སྐད་གྲགས་ཆོད་ཡོད་ཀྱང་། མཐར་ལམ་ཁའི་རྡོ་བཞིན་བསྐྱུར་ཏེ་སོང་བ་ནས་བཟུང་བརྩེ་དུང་ཟེར་བ་འདི་ལ་ཡི་ཆད་ཅིང་། རང་ལ་འཇོན་ཐང་དང་རྒྱུ་ནོར་མེད་པའི་ཁར། ལོ་སྔ་ཕྱི་འདི་དག་གི་རིང་རྒྱག་པ་ཆགས་ནས་བཟོ་ལྟ་ཡང་ཤོར་ཚར་བས། ད་བུད་མེད་ཚོ་མི་དགའ་བ་ཡིན་རྒྱུ་རེད་བསམ་སྟེ་སེམས་ཤུགས་གཏིང་ནས་ཆག་ཡོད་པའི་དུས་ཤིག་ཀྱང་ཡིན། ཡང་ཕྱོགས་གཅིག་ནས་ད་དུང་རང་ཉིད་ལོ་ཆེན་པོ་མིན་པས་ཁེར་འདུག་གིས་མི་ཚེ་འཁྱོལ་ཐབས་མེད་པར་བརྟེན། ལུས་སེམས་ཀྱི་སྐྱ་ཡ་རེ་མི་འཚོལ་ཐབས་མེད་ཡིན་སྟབས། ཡར་མར་ལ་རྐང་པ་གཉིས་འཛུགས་གསུམ་འཛུགས་རེ་ཡང་བྱེད་ཀྱི་ཡོད་ཅིང་། ང་ལ་འཇོན་ཐང་མེད་ཅིང་རྒྱུ་ནོར་གྱིས་དབུལ་རུང་རིན་པོ་ཆེའི་མིང་ཞིག་ཡོད་པ་དང་། འདྲ་པར་གྱི་ཐོག་ཏུ་གདོང་པ་རྫིག་པོ་ཞིག་ཡོང་གི་ཡོད་པས་རྒྱ་གར་དང་བལ་ཡུལ། ཨ་རི་བཅས་སུ་སེམས་པ་ཐག་ཉེ་བོ་བྱེད་མཁན་དང་། ཕར་ཚིག་མགོ་བླངས་ན་ཚིག་མཇུག་ལ་འཁྲི་ངེས་ཡིན་པའི་བུ་མོ་བཅུ་གྲངས་ཤིག་ཡོད། འོན་ཀྱང་བུ་མོ་འདི་དང་ཐུག་རྗེས་བུ་མོ་གཞན་དག་དང་སྐད་ཆ་བཤད་རྒྱུ་ཡང་རེ་རེ་བཞིན་རང་བཞིན་གྱིས་མཚམས་ཆད་སོང་།
གང་མཚམས་ནས་ངའི་སེམས་ཀྱི་ནང་དུ་བུ་མོ་འདི་ཉིད་ཁོ་ན་མ་གཏོགས་བསམ་རྒྱུ་དྲན་རྒྱུ་གཞན་ཅི་ཡང་མེད་པ་ཞིག་ཆགས་སོང་རུང་། གལ་ཏེ་ཁོ་མོས་ངོས་ལེན་མ་བྱས་ན་ངའི་སེམས་ལ་སྡུག་བསྔལ་ཆེན་པོ་ཡོང་ངེས་ཡིན་པས་བརྩེ་དུང་གི་སྐད་ཆ་དངོས་ནི་ཐད་ཀར་བཤད་མ་ཕོད། འོན་ཀྱང་ངའི་སེམས་ནང་དུ་ཁོ་མོ་ཡོད་པའི་བརྡ་སྟོན་ཆེད། ཁོ་མོའི་འདྲ་པར་རང་གི་གློག་ཀླད་ཀྱི་མདུན་ངོས་སུ་བཞག་ཡོད་པའི་པར་བཏང་ཞིང་། ད་དུང་གོང་དུ་གསལ་བའི་པར་དེ་ཨ་རིའི་རྒྱལ་ས་ཝ་ཤོན་ཏྲོན་དང་། ནེའུ་ཡོག་རང་དབང་ལྷ་མོའི་སྐྱེད་ཚལ་དུ་ཡོད་པ་སོགས་པར་སྒམ་(photoshop)གྱི་ནང་ནས་བཟོས་ཏེ་ཁོ་མོར་བཏང་།

དེས་ན་མོས་ཀྱང་ངའི་སྙིང་ཡོངས་རྫོགས་མོ་ལ་ཟུག་ཡོད་པ་དང་། ཁ་ནས་ཅི་ཡང་བཤད་ཕོད་ཀྱི་མེད་པ་ཤེས་ནས་མོ་རང་ཡང་ང་ལ་སེམས་ཐག་ཉེ་པོ་ཡོད་པའི་བརྡ་གསལ་པོ་བྱས་སོང་། དེར་བརྟེན་ག་ལེ་ག་ལེར་ངས་ཚིག་མགོ་བླངས་ཏེ། ད་ཆ་ངའི་སྙིང་ཡོངས་རྫོགས་ཁྱེད་ཀྱིས་བརྐུས་སོང་བས་ངས་ཅི་ཞིག་བྱ་དགོས་སམ་ཞེས་བརྗོད་པ་ཡིན། ཁོ་མོས་ང་ནི་ལས་རྒྱུ་འབྲས་ལ་བརྩི་མཁན་གྱི་བུ་མོ་ཞིག་ཡིན་པས། གལ་ཏེ་ཁྱེད་ཀྱི་སྙིང་ཡོངས་རྫོགས་ངའི་སར་ཡོད་ན། ངས་གཅེས་སྐྱོང་བྱས་ནས་བདག་པོ་རྒྱག་གི་རེད་མ་གཏོགས་ས་རྗེན་ལ་དུས་ནམ་ཡང་འཇོག་གི་མ་རེད་ཟེར། འདི་ནི་ངེད་གཉིས་ཀྱིས་བརྩེ་དུང་གི་སྐད་ཆ་གླེང་བའི་ཐོག་མ་ཡིན།
བདུན་ཕྲག་གཉིས་ཀྱི་རྗེས་ནས་ང་ནེའུ་ཡོག་ཏུ་ཆོས་ཁྲིད་ལ་ཕྱིན། སྐབས་དེར་ངའི་སློབ་མ་གློག་བརྙན་འཁྲབ་སྟོན་པ་(bollywood)མེ་ཁལ་གྱིས་ང་ལ་ལག་འཛིན་ཁ་པར་ཧ་ཅང་གོང་ཆེན་ཞིག་སྤྲད་སོང་། སྤྱིར་ངའི་རང་གཤིས་ལ་ཅ་ལག་གོང་ཆེན་བེད་སྤྱོད་བྱེད་རྒྱུར་དགའ་པོ་མེད་སྟབས་ཁ་པར་དེ་མི་ལེན་བསམ་རུང་། ཡང་ཁོ་མོ་ལ་རྔན་པར་གཏོང་དགོས་བསམ་ནས་ཁ་པར་དེ་བླངས་པ་ཡིན། དེ་ནས་ཕྱིར་རང་གི་སྡོད་གནས་སུ་སླེབས་སྐབས་ཁ་པར་དེ་མྱུར་སྦྲགས་ཐོག་ནས་གཏོང་རྒྱུའི་གྲ་སྒྲིག་བྱས། འོན་ཀྱང་སེམས་ནང་དུ་དེ་ལས་ཀྱང་མང་བ་ཞིག་གཏོང་འདོད་བྱུང་བས། ཟླ་གཅིག་གི་སྔོན་གདུང་སྲས་ཕྲིན་ལས་ནོར་བུ་རིན་པོ་ཆེ་སོགས་ཀྱི་ཕྱག་བརྒྱུད་ནས་ཡོང་བའི་གསེར་ཀྱི་སྐེ་རྒྱན་ཆེ་ཞིང་ལེགས་པ། ཧིན་སྒོར་ཁྲི་བདུན་བརྒྱད་དམ་འབྲུག་ནས་ཉོས་ན་ཧ་ལམ་ཧིན་སྒོར་འབུམ་ཙམ་རི་བ་ཞིག་ཡོད་པ་དེ་ང་རང་ནི་བེད་སྤྱོད་བྱེད་རྒྱུར་མི་དགའ། གཞན་ལ་ཡང་མ་སྤྲད་པར་ཡི་དམ་དབྱངས་ཅན་མའི་འདྲ་སྐུའི་མགུལ་རྒྱན་དུ་སྒྲོན་ཡོད་པ་དེ་ཡང་བླངས་ཏེ། གཅིག་ནས་བུ་མོ་འདིའི་རྒྱུད་ལ་འཕགས་མ་ཐུགས་རྗེ་ཅན་གྱི་བྱིན་རླབས་འཇུག་པའི་རྟེན་དང་། གཉིས་ནས་ཡག་ཉེས་ཅི་བྱུང་རུང་རང་གི་ཁ་རྗེ་དབང་ཐང་ཚང་མ་ཁོ་མོའི་ལག་ཏུ་སྤྲོད་འདོད་ཅིག་བྱུང་བས་དེ་དག་མྱུར་སྦྲགས་ཐོག་ནས་བཏང་བ་ཡིན། ཉིན་དྲུག་གི་རྗེས་ནས་དེ་དག་མོའི་ལག་ཏུ་འབྱོར་འདུག་པ་དང་། ཁོ་མོ་ཧ་ཅང་དགའ་བོ་བྱུང་འདུག་པས་ངའི་སེམས་ནང་དུ་ཉི་མ་ཤར་བ་ལྟ་བུ་ཞིག་བྱུང་། འདི་ནི་ངས་ཁོ་མོར་ཕུལ་བའི་བརྩེ་དུང་གི་ལེགས་སྐྱེས་དང་པོ་ཡིན། དེའི་རྗེས་སུ་མོས་ཀྱང་ང་ལ་འབྲུག་རྒྱལ་བཞི་པའི་ཁྲི་སྟོན་གྱི་སྐལ་བ་ལས་བྱུང་བའི་གསང་བདག་ཕྱག་ན་རྡོ་རྗེའི་སྲུང་འཁོར་ཁྱད་པར་བ་དང་། རྒྱལ་སྟོན་དྲན་རྟེན་གྱི་དངུལ་སྒོར། མོ་རང་གི་གཅེན་མོ་གཡུ་སྒྲོན་གྱིས་ངའི་ཆེད་དུ་དཀའ་ལས་བརྒྱབ་སྟེ་ལག་འཐག་བྱས་པའི་སྐ་རགས། ཧིན་སྒོར་སྟོང་ཕྲག་དྲུག་ལྷག་རི་བའི་འབྲུག་ལུགས་ཀྱི་ཉལ་གདན་གོང་ཆེན། འབྲུག་གི་ཕྱུར་བ་སྐམ་པོ་སོགས་ཀྱི་རྔན་པ་མང་པོ་མྱུར་སྦྲགས་ཐོག་ནས་བཏང་སོང་།
ཁྱད་པར་ཁོ་བོའི་ཕྱིའི་ལོ་རྒྱུས་ལེའུ་དགུ་པར་གསལ་བ་བཞིན། ༢༠༡༠ལོའི་ལོ་མཇུག་ཏུ་ཉིན་ཞིག་རང་ཉིད་འཆི་བ་ལ་ཐག་ཧ་ཅང་མི་རིང་བའི་རྟོག་པ་ཞིག་གློ་བུར་དུ་སླེབས་ཤིང་། དེའི་རྗེས་སུ་བདུན་ཕྲག་ཁ་ཤས་ཀྱི་རིང་ཉིན་མཚན་བསྟུད་མར་འཆི་བའི་ལྟས་སྣ་ཚོགས་དང་། བཟློག་ཐབས་ཀྱི་རིམ་པ་ཡང་ཅི་རིགས་པར་ཤར་ཡང་སྐུ་རིམ་སོགས་ནི་གང་ཡང་མ་བྱས་ཤིང་། གཅེན་པོ་སོགས་ལ་ཡང་དེ་ལུགས་ཞུ་མ་ཕོད། དེར་མ་ཟད་ཁོ་བོ་རང་གི་ཕྱོགས་ནས་ཀྱང་ཕྱི་ནང་གི་རྐྱེན་རྣམ་པ་སྣ་ཚོགས་ཀྱིས་ཧ་ཅང་སུན་ནས་ངུ་ལ་ཐུག་ཡོད་པའི་རྒང་ཤིག་ཡིན་སྟབས། དེང་སང་དུས་ཀྱི་དབང་གིས་བསྟན་པའི་འཛིན་སྐྱོང་ནི་མི་དྲག་ཆེན་པོའི་རིགས་རྣམས་མ་གཏོགས་ཁོ་བོ་ལྟ་བུ་ཁ་རྗེ་ཐོབ་ཐང་གང་ཡང་མེད་པ་ཚོས་ཅི་ཡང་མི་ཡོང་ལ། སེམས་ཅན་གྱི་དོན་ཟེར་བ་ནི་རང་གི་ཁ་ལྟོ་མི་འཁྱོངས་པ་བདག་ལྟ་བུ་ཞིག་གིས་དེ་ལས་ཀྱང་ག་ལ་ཡོང་། དེ་བས་མགོན་པོ་བྱམས་པས། སྐྱེ་བ་སྐྱེད་མོའི་ཚལ་འགྲོ་ལྟར་རྟོགས་ནས། ཞེས་གསུངས་པ་ལྟར་སྐྱེད་མོའི་ཚལ་ནས་སྐྱེད་མོའི་ཚལ་གཞན་ཞིག་ཏུ་ལྟད་མོར་འགྲོ་རྒྱུ་ཡང་སྐབས་སུ་མ་བབ་པ་ཅི་ཡང་མི་འདུག་སྙམ་པའི་ཀུན་སློང་གིས། ཐོས་པ་གོ་ཡུལ་དུ་ལུས་པའི་དམན་པ་བདག་ལྟ་བུ་ལ་ཞིང་ཁམས་སུ་ཐུགས་གཏད་ཟེར་རྒྱུ་ཞིག་མེད་རུང་། གང་ལྟར་མངོན་པར་དགའ་བར་བྱང་ཆུབ་སེམས་དཔའ་འཇིགས་པ་ཀུན་སྐྱོབ་དང་། བདེ་བ་ཅན་དུ་ཡབ་རྗེ་བླ་མ་འཇིགས་མེད་ཕུན་ཚོགས་འབྱུང་གནས། ཟངས་མདོག་དཔལ་རིར་ཨོ་རྒྱན་ཡབ་ཡུམ་བཞུགས་པ་རྣམས་ཀྱི་གང་རུང་ཞིག་གི་སྐུ་མདུན་དུ་མྱུར་བར་འགྲོ་ཐུབ་པའི་སྨོན་ལམ་གྱི་མཚམས་སྦྱོར་དང་འདུན་པ་བྱས་པ་ཡིན། རང་གིས་སྨོན་འདུན་དེ་ལྟ་བུ་བྱས་ནས་ཞག་གཅིག་ཀྱང་མ་འགོར་བར། ཨེང་ལན་ཌིར་སྐུ་བཞུགས་མཁན་ཆེན་བླ་མ་དམ་པ་དཔལ་དགྱེས་པ་རྡོ་རྗེའི་སྒྲིབ་མེད་གཟིགས་པའི་ཡེ་ཤེས་ཀྱིས་གསལ་བོར་མཁྱེན་ཏེ། འདི་སྔོན་ངེད་དཔོན་གཡོག་གཉིས་ངོ་ཤེས་དང་གྲོགས་པོ་ནང་མ་དེ་འདྲ་གང་ཡང་མིན་རུང་། གློག་འཕྲིན་བརྒྱུད་ནས་ཕྲན་ལ་རིང་འཚོའི་ཞབས་བརྟན་ཁག་གཅིག་འཕྲལ་དུ་མཛད་པ་དང་བསྟུན། བསྟན་འགྲོའི་དོན་དུ་ཡུན་རིང་འཚོ་དགོས་པའི་ཞལ་ནན་ཅི་བས་ཀྱང་ཆེ་བ་ཕེབས་པར་མ་ཟད། བླ་མ་རུང་དུ་ཡང་ང་ལ་ཚེ་གཟུངས་དང་ཚེ་བསྙེན་སོགས་ཞུ་རྟེན་བསྐུར་ཚར་འདུག་པ་དང་། ཡང་རིགས་པའི་གྲོགས་པོ་ཁྲག་འཐུང་བདེ་ཆེན་གླིང་པ་ལ་དེ་ལུགས་ཀྱི་ནང་གཏམ་ཞིག་ཞུ་ཐལ་ཤོར་བས། ཁོང་ནས་ཀྱང་བཀའ་བཀྱོན་དང་འབྲེལ་རིང་འཚོ་དགོས་པའི་ཞལ་ནན་ཤིན་ཏུ་ཟབ་མོ་ཕེབས། ཁྱད་པར་འཇིག་རྟེན་གྱི་གསོན་སྙིང་དྲོན་མོ་རྡོག་གཅིག་ཏུ་འདྲེས་པའི་བུ་མོ་འདི་ལ་ཕྱོགས་ཙམ་མ་ཞུས་ན། ཁྲམ་པ་དང་ཁྲེལ་མེད་དུ་འགྲོ་བར་བསམས་ནས་དེ་ལུགས་ཀྱི་སྙིང་གཏམ་ཟུར་ཙམ་ཞུས་པར། ཁོང་མོ་དགུང་ལོ་གཞོན་ཞིང་ཆོས་ཕྱོགས་ཀྱི་སློབ་གཉེར་དེ་ཙམ་མེད་རུང་ངའི་ཡིད་ཡུལ་དུ་མ་ཤར་བ་ཞིག་ལ། ཞི་དྲག་གི་ཐབས་མཁས་སྣ་ཚོགས་ཀྱིས་ཁོ་བོ་བཟུར་ས་བཀྱེད་ས་མེད་པ་བཟོས་ཏེ་ངའི་སྙིང་གི་བདག་པོ་(Heart owner)མོ་རང་ཁོ་ན་ཡིན་པའི་མནའ་བསྐྱལ་དུ་བཅུག་རྗེས། ཁོ་མོའི་དབང་ཆ་དེའི་ཐོག་ནས་ཁོ་མོ་རང་གི་དགོངས་འཁྲོལ་མེད་པར་རིང་འཚོའི་འདུན་པ་ཁོ་ན་ལས་བསམ་བློ་གཞན་གཏོང་མི་ཆོག་པ་ཆོས་ཕྱོགས་ཀྱི་དམ་ཚིག་དང་། འཇིག་རྟེན་གྱི་བརྩེ་འདུན་ཟབ་མོ་དཔང་དུ་བཞག་ཏེ། ཐེངས་མང་པོར་སྤྱན་ཆབ་མང་དུ་བསིལ་བཞིན་གསུང་ནན་ཤིན་ཏུ་ལྕི་བ་ཕེབས་པའི་རྐྱེན་གྱིས་རང་ངོས་ནས་ཀྱང་རིང་འཚོའི་སྨོན་འདུན་དང་། ཡི་དམ་ལྷའི་བྱིན་རླབས་ཀྱི་མཚན་མ་ལས་བྱུང་བའི་སྐུ་རིམ་རྣམས་བྱས་པས། དེ་ནས་བཟུང་འཆི་བའི་ལྟས་དང་ཚེ་རིང་པོ་མེད་པའི་ཚོར་སྣང་དེ་ཡང་རང་ཡལ་དུ་སོང་སྟབས། ད་བར་ཁོ་བོ་འཇིག་རྟེན་དུ་འཚོ་བ་འདིའི་ཐོག་ལ་ཡང་བུ་མོ་འདིའི་སྐུ་དྲིན་ཤིན་ཏུ་ཆེན་པོ་ཡོད།
ཁོ་མོས་ང་ལ་རིང་འཚོའི་རྟེན་འབྲེལ་དང་། མ་འོངས་པར་ཁོ་མོ་ངའི་ཚེ་རྟེན་དུ་འགྱུར་བའི་རྟེན་འབྲེལ་ཡིན་གསུངས་ནས་ཡུན་རིང་པོར་མནབས་ཟིན་པའི་ནང་གོས་ལྗང་གུ་རྙིང་པ་སྐུ་དྲེག་ཅན་ཞིག་དང་། ནུ་ཤུབས་དམར་པོ་རྙིང་པ་སྐུ་དྲེག་ཅན་ཆུ་ལ་བཀྲུས་མེད་པ་ཞིག་བཅས་མྱུར་སྦྲགས་ཐོག་ནས་བསྐུར་བྱུང་བ་ང་ལ་འབྱོར་རྗེས། ཞག་གཅིག་ཀྱང་མ་འབྲལ་བར་བརྩེ་འདང་གི་བྱིན་རླབས་ཅན་གྱི་གོན་པ་དེ་རྣམས་དང་མཉམ་དུ་ཉལ་གྱི་ཡོད་ཅིང་། ནེའུ་ཡོག་སོགས་སུ་ཆོས་ཁྲིད་ལ་འགྲོ་སྐབས་ཀྱང་འཁྱེར་ནས་འགྲོ་གི་ཡོད། ཁོ་མོའི་གོན་པ་དང་ནུ་ཤུབས་འབྱོར་བའི་དགུང་མོར་ལོངས་སྐུའི་རྒྱན་ཆས་ཅན་གྱི་བུད་མེད་དཀར་མོ་མི་ལས་འདས་པའི་ལང་ཚོ་ཅན་ཞིག་བྱུང་སྟེ་དབྱིན་སྐད་ཀྱི་ཐོག་ནས། འདི་ཁྱོད་ལ་ཚེ་དབང་རིག་འཛིན་ཆོས་སྐྱིད་དབང་མོས་བསྐུར་བའི་འཆི་མེད་ཡེ་ཤེས་ཀྱི་བདུད་རྩི་རེད་ཅེས་ (this is deathless wisdom nectar and Tsewang Rigzin Chokey Wangmo send to you) འོ་མ་ཤེལ་ཕོར་གང་སྤྲད་སོང་བ་ཞིག་རྨིས་པ་དེ་ཡང་རྟེན་འབྲེལ་ཤིན་ཏུ་ལེགས་པོར་སྣང་།
སྤྱིར་དེང་སང་སྟོན་པ་སངས་རྒྱས་ལ་ཡང་སྐུར་འདེབས་ཀྱི་ཀུ་ཅོ་ཧ་ཅང་མང་ཞིང་། སྐྱེ་བོ་རྣམས་ཤེས་རབ་འཆལ་བ་ཡང་མང་དྲགས་པས། བླ་མ་ངོ་མ་ཞིག་དང་སྐྱེས་བུ་དམ་པ་ཞིག་ཡིན་ན་ངེས་པར་དུ་བླ་ཆེན་དཔོན་ཆེན་ཐོབ་ཆེན་ཞིག་ཡིན་དགོས་པ་དང་། བླ་ཆེན་དཔོན་ཆེན་ཐོབ་ཆེན་ཞིག་ཡིན་ན་སྐྱོན་ཇི་ཙམ་དང་རྙོག་དྲ་ཅི་ཙམ་ཡོད་ཀྱང་ཁ་ཙམ་ཡང་གཏོང་མི་རུང་བ། དེ་ལྟ་མིན་ན་བླ་མ་དང་སྐྱེས་བུ་དམ་པ་གང་ཡང་མིན་པར་ཁོ་ཐག་གཅོད་པའི་སྐབས་འདིར། ཁོ་བོ་ལྟ་བུ་ཁ་རྗེ་ཐོབ་ཐང་གང་ཡང་མེད་པ་ཞིག་གིས་སྐད་ཆ་འདིའི་རིགས་བཤད་པ་སྐུར་འདེབས་ཡོང་བའི་གཞི་ལས་མེད་པ་ལོས་ཤེས་ཏེ། ལོ་རྒྱུས་ནི་ལོ་རྒྱུས་ཡིན་པས་བརྗེད་ངས་ཀྱི་ཆོམ་པོས་མི་འཕྲོག་པའི་ཕྱིར་དཀྱུས་གཅིག་ཏུ་འབྲི་བ་གལ་ཆེ་ཞིང་། སྤྱིར་ཁོ་བོ་རང་གིས་བྲིས་པའི་རང་གི་ལོ་རྒྱུས་ཀྱི་ཟིན་བྲིས་རྣམས་ཀྱང་གཞུང་དང་། རྣམ་ཐར་དང་། ཆོས་འབྱུང་དང་། བསྟན་བཅོས་སོགས་ནི་ཅི་ཡང་མ་ཡིན་པར་རིགས་པའི་གྲོགས་པོ་རྣམས་དང་། རང་གི་མི་རྒྱུད་རྗེས་མ་རྣམས་ལ་མི་ཚེའི་སྐྱིད་སྡུག་གི་དངོས་བྱུང་ལོ་རྒྱུས་ཀྱི་ཁ་བརྡ་ཙམ་ཞིག་བྱས་པ་གཙོ་བོར་བཟུང་ཡོད་པས། རིགས་དང་། ཐོས་པ་དང་། ཤེས་རབ་དང་། གདམས་ངག་གི་བརྒྱུད་པ་མི་གཅིག་པ་རྣམས་ཀྱི་རྣ་བར་འགྲོ་མི་འགྲོ་ལ་ནི་སེམས་ཁྲལ་གང་ཡང་བྱས་མེད་དོ།། དེར་མ་ཟད་ཆོས་ཀྱི་ཉམས་ལེན་ལས་བྱུང་བའི་ལག་རྗེས་མིན་རུང་། འཇིག་རྟེན་གྱི་ཉམས་མྱོང་བསགས་པ་མང་དྲགས་པས། དེང་སང་མི་སུ་ཞིག་གིས་རྒྱུ་མཚན་ཡོད་མེད་ཀྱི་སྐུར་འདེབས་ཅི་བྱེད་ལ་རེ་དོགས་རྩྭ་རྩེའི་ཟིལ་བ་ཙམ་ཡང་བྱེད་ཀྱི་མེད་པས། འཇིག་རྟེན་ཆོས་བརྒྱད་ཀྱི་ནང་གི་མི་སྙན་པ་དང་། སྨད་པ་གཉིས་མི་འདོད་པའི་བསམ་བློ་ནི་གཏན་ནས་གཏན་དུ་སྤངས་ཟིན་པ་ཡིན་ལགས།
དེ་ལྟར་ཁོ་བོ་རང་གི་སྙིང་དུ་སྡུག་པའི་ཆུང་མས་གསོན་བསྐྱུར་བྱས་ཤིང་། ཁྱི་ལས་ཀྱང་རུས་རྐང་ཞན་པའི་གྲོགས་པོ་འགའ་ཞིག་གིས་རོ་ཐོག་རྟ་རྒྱུག་གང་མང་བྱས་ཏེ། སེམས་སྡུག་དང་ངོ་ཚ། བློ་ཕམ་ཡི་ཆད་སོགས་ཀྱིས་ངོ་ཤོར། གཉའ་ཆག མགོ་འཕང་སྨད་ནས་སྡོད་པའི་སྐབས་སུ་ལྷ་ཡི་སྲས་མོ་འདི་དཀོན་མཆོག་གིས་ང་ལ་སེམས་གསོར་བཏང་བ་ལྟ་བུ་ཞིག་བྱུང་ཞིང་། སྲོག་ལས་གཅེས་པའི་བུ་མོ་འདི་དང་ཐུག་ཅིང་བུ་མོ་འདིའི་སྦྲང་རྩི་ལས་ཞིམ་པའི་བརྩེ་དུང་གི་རྒྱ་མཚོ་ཡོད་ཚད་ཁོ་བོའི་ཕྱོགས་སུ་འཁྱིལ་རྗེས། སེམས་ནང་གི་སྡུག་བསྔལ་དང་སུན་སྣང་ཐམས་ཅད་ཀྱང་ག་ལེ་ག་ལེར་གཏན་ཡལ་དུ་གྱུར་སོང་བས། སྐབས་རེ་རང་ཉིད་གཅིག་པུ་ཡིན་སྐབས། བུ་ཡག་ཅིག་གི་སྐྱེ་ཡག་མེད་རུང་།། མོ་ཡག་ཅིག་གི་སེམས་པ་འཁོར་ཡོད།། ཅེས་པའི་གཞས་དེ་དང་། རིག་འཛིན་ཚངས་དབྱངས་རྒྱ་མཚོའི་གསུང་མགུར་ནང་གི་ཚན་པ་འགའ་རེ་བཏང་ཞོར་རྐང་བྲོ་བརྒྱབ་ནས་སྨྱོས་བཏང་བ་ལྟ་བུའི་སྤྱོད་པ་བྱེད་ཀྱི་ཡོད།
དེར་མ་ཟད་ཁོ་བོ་ཅག་འོད་གསལ་གསང་བ་སྙིང་ཐིག་གི་ཆོས་བརྒྱུད་འཛིན་པ་རྣམས་ལ་དམིགས་བསལ་རྨི་ལམ་གྱི་རྟེན་འབྲེལ་ཡག་པོ་ཡོད་པའི་དབང་ལྟར་དུ་བྱས་ན། ངས་བུ་མོ་འདི་ཉིད་ཡི་དམ་དབྱངས་ཅན་མ་ལ་མཆོད་པའི་སྤྲིན་དུ་ཕུལ་བའི་སྟོབས་ཀྱིས་རྡོ་རྗེ་དབྱངས་ཅན་མའི་བྱིན་རླབས་རང་གི་རྒྱུད་ལ་ཞུགས་པ་དང་། ཡང་དབང་གི་ཕྲིན་ལས་འགྲུབ་ཅིང་རྡོ་རྗེས་སྲུང་མ་རྣམས་ཀྱིས་བར་ཆད་བཟློག་པ་དང་། ཡང་བུ་མོ་འདི་གཞན་ལས་ཁྱད་དུ་འཕགས་ཤིང་། ཐུགས་ཀྱི་བརྩེ་བ་ཡོད་ཚད་ཉི་མའི་དཀྱིལ་འཁོར་ལྟར་ཁོ་བོ་རང་གི་ཕྱོགས་སུ་ཤིན་ཏུ་གསལ་བོར་ཡོད་པ་སོགས་ཀྱི་རྨི་ལྟས་བྱུང་བ་རྣམས་། བརྗེད་པར་ཕངས་ནས་འཕྲལ་མ་ཉིད་དུ་དབྱིན་ཡིག་ཏུ་བྲིས་ཏེ་རྒྱལ་སྤྱིའི་རང་བཞིན་ཅན་གྱི་ངོ་དེབ་ཏུ་བཀོད་པ་དག་གཤམ་དུ་གསལ་བ་རྣམས་ཡིན་ནོ།།
March 3 of 2011This afternoon I dreamed, there was very nice clouds on the sky, look like elephant, bird, horse, and flowers, the sky is very pure and very clean, then I call to Chokey’s sis Pama, I said “hi Pema! Please come out right now and look on the sky. There are this much beautiful clouds” then Pema came outside and we looked to the sky together, but that time there are sun is very shining and around of sun very beautiful and glorious rainbow, that rainbow is very circle, then Pame said to me “oh look!! This sun is your Chokey” then when I wake up I am very very happy as like in the haven,

this picture is just for example, but my dream is 1000 times beautiful and cleans than this picture,
March 4 of 2011Last night I have again a special dreamed, I reached to the pure land where I wish reach always, ( Bhutan) then my beloved lover (Chokey) making to us big bad on the floor. we have very nice mattress and yellow and red blanket, those all very new and very shining, then one of her sis came to me and she says to me with low sinking voice in my ear “ I have to go now to my home this is for you” then she give to me one red satin for make overcoat, but there is many deferent kind very big scorpions and one very big lack frock inside door, I feel very fear and uncomfortable for them, But then one born dog came and eat those all like magic, So this morning I called to Lama Rinpoche (Khenchen Lama) and explained that dream, then he say to me “oh that one lady give to you red satin for make your overcoat. That is sign of you will accomplishes for Activity of power, those scorpions and black frock is sins and obstacles, that born dog is Zhogchen religion’s Dharma protectors, so you will very successful for everything if you can meet your holy beloved lover, (Chokey) and practice something”
March 17 of 2011This after noon I dreamed I am in the some temple look like copper color mountain with many great Accomplished lamas, then few white women offering some thing to lamas one by one, when they are teach to me they offered to me some different money, there are some US Dollars too, but there is one very new and shining Bhutanese Ngultrum 100 one, then I feel “Oh!!!!!!! This is the very first I got Bhutanese Ngultrum” then I offered to Saraswati that Ngultrum with high invocation, but then I realized this is dream, then again I invocate to Saraswati with high voice, I said “right now I am offering to you in the dream so please must give to me great blessing” then Saraswati give to me white light ray from my central channel crown of the head, and I saw my all channels are red, then slowly that white light rays came to in all channels of my body and my feeling is very happiness with faith full more than I can’t say,

when I wake up I thought about that, then I feel that Bhutanese Ngultrum mean is showing my Chokey of Bhutanese and 100 mean is 100% new and shining mean is very complete sincerity and love, so I feel that is very great dream because this dream is after I done 100% work visa for I go to Bhutan very soon for meet to Chokey,
གོང་དུ་གསལ་བ་རྣམས་ནི་རང་ལ་དབྱིན་ཇི་ཡག་པོ་མེད་ཀྱང་ངོ་མཚར་ཅན་གྱི་རྨི་ལྟས་བྱུང་རིམ་བཞིན་རང་ཉིད་ཀྱིས་དབྱིན་ཡིག་ཐོག་ཏུ་བྲིས་ནས་ངོ་དེབ་སྟེང་དུ་བཀོད་པ་ཡིན་ཞིང་། བྲིས་མེད་པ་ཡང་ཤིན་ཏུ་མང་། གཞན་ཡང་ནུབ་གཅིག་ངའི་ཁྱིམ་ཡོངས་རྫོགས་ལ་གད་བརྡར་ཤིན་ཏུ་གཙང་མ་འོད་འབར་བ་ཞིག་བྱས་ཏེ། ཁྱིམ་དཀྱིལ་དུ་མདུན་ཅོག་ཆེན་པོ་གཅིག་བཤམས་པའི་ཐོག་ཏུ་ཟིལ་བ་ཕྲུམ་མེར་ཡོད་པའི་ཤིང་ཏོག་ཀུ་ཤུ་དང་། ལྕང་སུལ་ལམ་ཆང་བ་ལུ། ཁམ་བུ། འབྲི་ཏ། རྒུན་འབྲུམ། བིལ་བ། སེ་འབྲུ་སོགས་སྡེར་མ་སྣ་ཚོགས་ཀྱི་ནང་དུ་ཕྱུར་བུར་བཀང་ནས་བཤམས་འདུག་པ་དང་། འོ་ཇ་ཕོར་བ་འགའ་བླུགས་ནས་བསྒྲིགས་འདུག་པ་ལས་ཁ་བླངས་འཕྱུར་བཞིན་འདུག་ཅིང་། དམར་ཟས་ཀྱི་རིགས་ནི་གཅིག་ཀྱང་མི་འདུག དེར་ངས་བསམ་པར་ཆོས་སྐྱིད་ཡོང་ནས་ངའི་ཁྱིམ་ལ་འདི་དག་བཟོས་འདུག་ཀྱང་། ང་གཉིད་བསྡད་ཡོད་སྟབས་ཁོ་མོས་མ་བོས་བར་ག་ལེ་ག་ལེར་བསྒྲིགས་པ་ཡིན་རྒྱུ་རེད་བསམ། ཞོགས་པར་གཉིད་ལས་སད་རྗེས་རྨི་ལྟས་དེ་དང་མཐུན་པར་ཁོ་མོས་ང་ལ་འཕྲིན་ཡིག་ཅིག་སླེབས་འདུག་པ་ལས། དེ་རིང་དགའ་རོགས་དུས་ཆེན་ཡིན་པས་ང་ཞོགས་པ་སྔ་བོ་ནས་ཡར་ལངས་ཏེ། ཁྱེད་ཀྱི་སྐུ་པར་མདུན་ཅོག་ཐོག་ཏུ་བཤམས་ཤིང་། དེའི་མདུན་དུ་གསོལ་ཇ་དང་ཤིང་ཐོག་སོགས་བསྒྲིགས་ནས་མཆོད་པ་སྣ་ཚོགས་བཤམས་པ་ཡིན་ཟེར། ངས་རྩེད་མོ་ལྟ་བུར་ང་ཤ་ཟ་རྒྱུར་དགའ་བས་ཤ་བཤམས་པ་ཡིན་ནམ་ཞེས་དྲིས་པས། ཅུང་ཙམ་ནས་ཡིག་ལན་སླེབས་ཏེ་ཁྱེད་ལ་བརྩི་མཐོང་གི་ཆེད་དུ་དམར་ཟས་ཀྱི་རིགས་ནི་བཤམས་མེད་ཟེར། དེས་ན་རྨི་ལྟས་དེ་ནི་དེ་ལ་བལྟས་པ་ལྟ་བུར་འདུག་ཀྱང་ང་རང་གི་བསམ་བློར་བུ་མོ་འདིས་ངའི་ཁྱིམ་ལ་བཀྲ་ཤིས་བདེ་ལེགས་ཤིག་ཁྱེར་ཡོང་བའི་ལྟས་སུ་བརྩིས་ཡོད།
གཞན་ཡང་ངེད་གཉིས་ངོ་ཤེས་ཤིང་ཕན་ཚུན་བརྩེ་དུང་གི་འབྲེལ་བ་ཟབ་མོ་ཆགས་ཏེ་ཡུན་རིང་ཙམ་འགོར་རུང་། གནམ་ཀླད་ (Skype) ཀྱི་ཐོག་ནས་སྐད་ཆ་བཤད་པ་དང་། ཡིག་འབྲེལ་བྱེད་པ། ཕན་ཚུན་ལ་པར་བསྐུར་རེས་བྱེད་པ་ཙམ་ལས་ཁོ་མོའི་ལས་ཁུངས་ཀྱི་གློག་ཀླད་ལ་པར་ལེན་འཕྲུལ་ཆས་མེད་པ་དང་། ཁྱིམ་གྱི་གློག་ཀླད་ལ་དྲ་ཤུགས་ཧ་ཅང་ཞན་པས་ཞལ་རས་དངོས་ནི་ཡུན་རིང་པོར་མཇལ་མ་ཐུབ། ཉིན་ཞིག་མོའི་ཁྱིམ་དུ་དྲ་ཤུགས་ཆེན་པོ་སླེབས་པས་ངེད་གཉིས་ལ་རེ་བ་མེད་ས་ཞིག་ནས་ཕན་ཚུན་གྱི་ངོ་ལ་བལྟས་ཏེ་སྐད་ཆ་བཤད་ཐུབ་པ་བྱུང་། འདི་ནི་ངས་མི་ཚེ་འདིར་ཁོ་མོའི་ཞལ་རས་དངོས་འཇལ་བ་ཐོག་དང་པོ་ཡིན་ཞིང་། ཉིན་དེ་ནི་མཁའ་འགྲོ་འདུ་བའི་དུས་ཆེན་ཏེ་བོད་ཟླ་༦པའི་ཚེས་༢༥དང་ཕྱི་ཟླ་༨ཚེས་༥ཉིན་རེད། ཉིན་འདིའི་ཞོགས་པར་ངས་ཡུམ་ཀ་བདེ་ཆེན་རྒྱལ་མོའི་ཚོགས་མཆོད་ཤིན་ཏུ་བསྡུས་པ་ཞིག་བྱས་ནས་ཉིན་གུང་རྗེས་ལ་ནེའུ་ཡོག་ཏུ་ཆོས་ཁྲིད་ལ་འགྲོ་རྒྱུའི་གྲ་སྒྲིག་བྱེད་ཀྱི་ཡོད། དེས་ན་སློབ་དཔོན་རིན་པོ་ཆེའི་འཁྲུངས་སྐར་གྱི་ཉིན་ངེད་གཉིས་ཐོག་མར་ཐུག་ཅིང་། མཁའ་འགྲོ་འདུ་བའི་དུས་ཆེན་གྱི་ཉིན་ཕན་ཚུན་གྱི་གདོང་ལ་དངོས་སུ་བལྟ་བའི་གོ་སྐབས་བྱུང་བ་དེ་དག་ཀྱང་གཅིག་བྱས་ན་ལྟས་དབང་ལྟ་བུ་ཡིན་སྲིད་རུང་། ཡང་གཅིག་བྱས་ན་རྟེན་འབྲེལ་ལེགས་ཕྱོགས་སུ་སྨིན་པའི་མཚན་མ་ལྟ་བུ་ཡང་ཡིན་མི་སྲིད་པ་མིན་སྙམ།

ད་དུང་ངའི་ལོ་རྒྱུས་ལེའུ་གསུམ་པར་གསལ་བ་ལྟར། སྔར་རང་དགོན་ཁྲ་གླིང་དགོན་དུ་སྡོད་སྐབས་ཀྱི་ཌཱཀྐིའི་ལུང་བྱང་། གོས་ངུར་སྨྲིག་གི་ཁ་དོག་ལྕང་ལོས་བསྒྱུར༔ ཐུགས་འོད་གསལ་གྱི་ཉི་མ་མཁའ་ལ་འཆར༔ སྦྲུལ་རེ་འབྱམས་ཀྱི་ཁ་རླངས་མ་ཕོག་ན༔ སྟག་འཛུམ་དྲུག་གི་རི་མོས་བྱང་ཆུབ་འགྲུབ༔ འཁོར་ལྷན་སྐྱེས་ཀྱི་ཌཱཀྐིའི་རྟེན་འབྲེལ་ལས༔ མ་གནས་གསུམ་གྱི་མཁའ་འགྲོས་བུ་བཞིན་སྲུང༔ ཞེས་པ་ལས་བྱུང་བ་བཞིན་བུ་མོ་འདིའི་ལོ་སྙིང་ཡང་སྟག་ཡིན་པས་ཕྱོགས་གང་ནས་བསམ་ཀྱང་འདྲ་སའི་ནང་ན་མ་འདྲ་བ་འགའ་རེ་ཡོད་པ་ཡིན།
དེ་ལྟར་ཕྱི་ལོ་༢༠༡༠ཟླ་༦ཚེས་༢༡ངེད་གཉིས་ཉིན་ངོ་ཤེས་ཤིང་། ༢༠༡༡ལོའི་ཟླ་༤པའི་ཚེས་༢ལ་དངོས་སུ་ཐིམ་ཕུག་ནས་ངོ་ཐུག་པའི་བར་ཧ་ལམ་ལོ་གཅིག་མ་ཟིན་ཙམ་གྱི་རིང་བརྩེ་དུང་གི་འབྲེལ་བ་ཟབ་ནས་ཟབ་ཏུ་ཕྱིན་ཅིང་། ཕན་ཚུན་ལ་རྔན་པ་སྣ་ཚོགས་མང་ཙམ་ཡང་མྱུར་སྦྲགས་ཐོག་ནས་བསྐུར་རེས་བྱས་པ་དང་། ང་ནེའུ་ཡོག་ཏུ་ཆོས་ཁྲིད་ལ་འགྲོ་བའི་སྐབས་དང་། སྐབས་རེ་ཁོ་མོ་ལས་དོན་ཀྱི་ཆེད་དུ་ཐིམ་ཕུག་ལ་ཉིན་ཤས་རེར་འགྲོ་དགོས་པའི་དུས་ཙམ་མ་གཏོགས། རྒྱུན་ཏུ་ཞོགས་པ་དང་དགོང་མོ་གཉིས་ཀར་དྲ་ཐོག་ནས་ཡུན་རིང་ཙམ་རེར་ཁ་བརྡ་མ་བྱས་པའི་ཉིན་ཞིག་ཧ་ལམ་མེད་ཅིང་། སྐབས་འདི་དག་ཏུ་ངས་སྔ་འགྱུར་རྒྱུད་འབུམ་ཆེན་པོའི་དཀར་ཆག་སོགས་འབྲི་བཞིན་ཡོད་པས། ང་རང་གི་ཕྱོགས་ཀྱི་དགོང་མོའི་དུས་ཚོད་ལ་ཕངས་སེམས་ཆེ་ཙམ་ཡོད་རུང་། དེའི་ཚབ་ལ་མཚན་མོ་ཕྱི་བོར་ཉལ་རྒྱུ་གཙོ་བོར་བྱེད་ཀྱི་ཡོད། ཁོ་མོ་བརྩེ་དུང་གི་འཕྲིན་ཡིག་འབྲི་བ་ལ་ཤིན་ཏུ་མཁས་པས་བརྩེ་འཕྲིན་འགའ་ཞིག་ངའི་དྲུང་ཡིག་དང་། སློབ་མ་སྐོར་ཞིག གྲོགས་པོ་ནང་མ་འགའ་ཞིག་བཅས་ལ་བསྟན་པར་ཁོང་ཚོའི་མིག་མཐར་མཆི་མ་འཁོར་གྱི་འདུག་ཅིང་། ངའི་དྲུང་ཡིག་སོགས་ང་ལ་སེམས་དཀར་མི་རྣམས་ཀྱིས་ངེད་ཕ་བུ་གཉིས་ཀྱི་དཔལ་འབྱོར་གྱི་གནས་སྟངས་སྐྱོ་བོ་ཡིན་པ་ཤེས་པས། ཐོག་མར་ང་རང་གི་ཆུང་མས་བསྐྱུར་རྗེས་ངའི་ཆང་ས་གཉིས་པ་དེ་ཨ་རིའི་མེ་སེར་ཡིན་པའི་བུ་མོ་རྒྱུ་ཅན་དང་། ཁང་པ་དང་མོ་ཊ་ཡོད་མཁན་ཞིག་དང་མཉམ་དུ་སྡོད་རྒྱུའི་རེ་བ་བྱེད་ཀྱི་འདུག་ཀྱང་། བུ་མོ་འདིའི་བརྩེ་འཕྲིན་རྣམས་མཐོང་བའི་རྗེས་ནས། རིན་པོ་ཆེ། ཉིད་ཀྱི་ཐུགས་སེམས་འཆོར་བར་ཁག་མི་འདུག བུ་མོ་འདི་ཐུགས་གཤིས་བཟང་ཞིང་ལས་འབྲས་ལ་བརྩི་མཁན་ཞིག་ཡིན་ཁོ་ཐག་རེད་འདུག་པས། སྐུ་ཉིད་ལྟ་བུ་ཐུགས་རྒྱུད་དྲང་ཞིང་། སྐུ་ཡོན་ཆེ་བའི་རིན་པོ་ཆེ་ཞིག་གི་སྐུ་ཟླར་ཧ་ཅང་འོས་པར་འདུག་ཟེར།
༢༠༡༠ལོའི་ལོ་མཇུག་ཏུ་ཁོ་མོའི་ཨ་མ་དང་། གཅེན་མོ་འགའ། མག་པ་འགའ་བཅས་རྡོ་རྗེ་གདན་སོགས་སུ་གནས་སྐོར་ལ་འགྲོ་སྐབས་ངས་དངུལ་ཕྲན་བུ་ཞིག་བསྐུར་རྒྱུ་བྱུང་བ་དང་། སྨན་དང་ཁྲུས་ཀྱི་ཅ་ལག པར་ཆས་སོགས་ཉེར་མཁོ་ཤོག་སྒམ་ཆེ་བ་གང་བསྐུར་ཞིང་། ཕལ་ཆེ་བ་ལམ་ཁ་ནས་ཁོ་མོའི་སྐུ་གཟུགས་ལ་བདག་པོ་རྒྱག་བྱེད་ཀྱི་ཅ་ལག་ཡོ་ཆས་ཤ་སྟག་ཡིན། ཅ་ལག་ཕྲན་ཚེགས་རེ་རེ་དང་མཉམ་དུ་ངའི་སེམས་ཀྱི་བརྩེ་བ་དྲོན་མོ་རེ་རེ་ཡོད་པས། ཅ་ལག་དེ་ཚོ་ཁོ་མོའི་ཕྱག་ཏུ་འཕྲོད་སྐབས་ངའི་བརྩེ་སེམས་ཁོ་མོའི་ཕྱག་ཏུ་འཕྲོད་པའི་ཚོར་སྣང་བྱེད་ཀྱི་ཡོད། འོན་ཀྱང་བུ་མོ་འདི་རྒྱུ་མཚན་ཤེས་ཤིང་ངོ་ཚ་ཁྲེལ་ཡོད་ཅན་ཞིག་ཡིན་པས་ཅ་ལག་གོང་ཆེན་གྱི་རིགས་བསྐུར་རྒྱུ་ལ་ནམ་རྒྱུན་དགག་བྱ་ནན་མོ་བྱེད་ཀྱི་འདུག
ཁོང་རྣམས་ཀྱིས་རྡོ་རྗེ་གདན་དང་། ཝ་ར་ཎཱ་སི། བྱ་རྒོད་ཕུང་རི། ན་ལེནྡྲ། ཟ་ཧོར་མཚོ་པདྨ་ཅན་སོགས་བསྐོར་ཏེ་ཕྱིར་སླེབས་རྗེས། ཁོ་མོས་ང་ཅིས་ཀྱང་འབྲུག་ལ་ཁོ་མོར་བལྟ་བར་ཡོང་དགོས་པའི་སྐུལ་མ་ཟབ་ནན་བྱས་པ་དང་། ངས་ཀྱང་སློབ་དཔོན་ཐུགས་རྗེ་ཅན་གྱི་བྱིན་གྱིས་བརླབས་པའི་སྦས་ཡུལ་འདིར་ལན་གཅིག་འགྲོ་འདོད་ཀྱི་འདུན་པ་བྱས་ནས་ལོ་བཅུ་གྲངས་འགོར་ཀྱང་ད་བར་འགྲོ་སྟབས་མ་འགྲིག་པས། ད་རེས་བློ་གཏད་ས་ཞིག་ཀྱང་ཡོད་པའི་གོ་སྐབས་འདི་ལ་ཅིས་ཀྱང་འགྲོ་དགོས་སྙམ་ནས་དེ་ལུགས་ཀྱི་ཐག་གཅོད་བྱས། སྤྱིར་ཁོང་ཚོ་རྡོ་རྗེ་གདན་དུ་མ་སོང་བའི་སྔོན་ནས་ང་འབྲུག་ལ་ཡོང་རྒྱུའི་སྐད་ཆ་བྱས་ཀྱང་། སྐབས་དེར་ངས་རྒུ་རེན་ཀར་ཊི་(Permanent Resident)མངགས་རྒྱུའི་ལས་ཀ་བྱེད་བཞིན་པ་དང་། ཕྱིར་བསྐྱོད་ལག་ཁྱེར་ཀྱང་ཐོན་མེད་པས་འགྲོ་ཐབས་མ་བྱུང་། ངས་རྒུ་རེན་ཀར་ཊི་དང་ཕྱིར་བསྐྱོད་ལག་ཁྱེར་མཉམ་དུ་མངགས་ཡོད་པས། འདི་ལོར་ཡང་གཅིག་བྱས་ན་ཟླ་བ་བརྒྱད་པ་དགུ་པ་ཙམ་ཞིག་གི་ནང་མ་གཏོགས་འགྲོ་ཐུབ་རྒྱུ་མ་རེད་བསམ་ཀྱང་། ཕྱི་ཟླ་༣པའི་ཚེས་༡༠ཉིན་ཕྱིར་བསྐྱོད་ལག་ཁྱེར་གློ་བུར་དུ་སླེབས་སོང་བས། དེའི་ཕྱི་ཉིན་ནས་འབྲུག་ལ་འགྲོ་རྒྱུའི་གྲ་སྒྲིག་བྱས། འོན་ཀྱང་འབྲུག་གི་ཐོངས་མཆན་རག་རྒྱུ་ཤིན་ཏུ་དཀའ་བར་བརྟེན། ཐེངས་འདིའི་འགྲིམ་འགྲུལ་གྱི་ཆེད་དུ་ང་དང་ངའི་སྙིང་ཉེ་བའི་གྲོགས་པོ་སྐོར་ཞིག་གིས་ཉིན་མཚན་གཉིས་ཀར་ཡིད་ཆེས་དཀའ་བའི་དཀའ་ལས་ཤིག་རྒྱག་དགོས་བྱུང་། ཐ་ན་༡༩༩༦ལོར་བོད་ནས་རྒྱ་གར་དུ་ཡོང་སྐབས་དང་། ༢༠༠༧ལོར་རྒྱ་གར་ནས་ཨ་རིར་སྐྱབས་བཅོལ་དུ་ཡོང་སྐབས་ཀྱང་། གྲ་སྒྲིག་གི་ཕྱོགས་ནས་ད་རེས་ཀྱི་གྲ་སྒྲིག་གི་དཀའ་ལས་དེའི་ཕྱེད་ཀ་ཙམ་ཡང་བྱུང་མེད་པས། གྲོགས་པོ་དྲིན་ཅན་ཁག་ཅིག་གིས་ཚེགས་ཤུགས་དང་རྒྱུ་ཤུགས་ལ་བསྡུར་མེད་ན་ང་རང་གི་ངོས་ནས་གང་ཡང་མི་འཇོན་ཁོ་ཐག་རེད།
གང་ལྟར་མཐའ་མཇུག་དེ་ལ་འགྲོ་ཐུབ་རྒྱུ་གཏན་ཁེལ་བས་ཕྱི་ཟླ་༣པའི་ཚེས་༢༩ལ་ནེའུ་ཡོག་ནས་ཕར་འགྲོ་རྒྱུ་དང་། ཕྱི་ཟླ་༤ཚེས་༢༧ལ་ཚུར་ཡོང་རྒྱུའི་གནམ་གྲུའི་འཛིན་བྱང་ཉོས། ད་རེས་ཀྱི་འགྲིམ་འགྲུལ་འདི་ལ་སྔར་དང་མ་འདྲ་བར་གནམ་གྲུའི་འཛིན་བྱང་གི་ཐོག་ནས་ཀྱང་དཀའ་ལས་གང་མང་འཕྲད་སོང་བས། ནེའུ་ཡོག་(New York)ནས་ཁ་ཆེའི་རྒྱལ་ཁབ་དྷུ་པའེ་(Dubai)དང་། དེ་ནས་བྷང་ལོར།(Bengaluru) དེ་ནས་དྷེ་ལི་གསར་བ།(New Delhi) དེ་ནས་བྷག་ཌོག་ར་(Bagdogra)བཅས་སུ་འཕུར་རྒྱུའི་འཛིན་བྱང་མི་ཉོ་ཐབས་མེད་བྱུང་རྐྱེན་ཕན་ཚུན་གཉིས་ཀར་གནམ་གྲུ་བརྒྱད་བརྗེ་དགོས་བྱུང་། འོན་ཀྱང་རང་ཁྱིམ་ནས་ཐོག་མར་ལམ་ལ་ཆས་པའི་ཉིན་སྟེ་ཚེས་༢༨ཉིན་གྱི་ཐོ་རངས་ལ་བུད་མེད་ནག་མོ་ཞིག་གིས་དབྱིན་ཡིག་གི་ཐོག་ནས། དབྱངས་ཅན་མས་ཁྱོད་ལ་རོགས་པ་བྱེད་ཀྱི་རེད། (Saraswati supports to you,) ཟེར་བའི་ཡིག་འཕྲིན་ཞིག་བསྐྱལ་བ་རྨིས་པས་ལམ་ཁར་གེགས་དང་བར་ཆད་ཅི་ཡང་མེད་ཅིང་། བསམ་དོན་ཡིད་བཞིན་དུ་འགྲུབ་པའི་གདེངས་ཚོད་བྱུང་།

ཚེས་༢༩དགོང་མོའི་ཆུ་ཚོད་བཅུ་གཅིག་གི་ཐོག་ནེའུ་ཡོག་རྒྱལ་སྤྱིའི་གནམ་ཐང་ནས་འཕུར་མགོ་བརྩམས་པ་དང་། ཚེས་༣༡ཉིན་གྱི་ཉིན་རྒྱབ་ཆུ་ཚོད་གཉིས་པར་ཤི་ལི་རྒུ་རིའི་གནམ་ཐང་བྷག་ཌོག་ར་རུ་སླེབས་ཤིང་། གནམ་ཐང་དུ་འབྲུག་གཞུང་གི་ལས་བྱེད་འགའ་ཞིག་སྒེར་ངོས་ནས་བསུ་བར་སླེབས་འདུག་པ་བཞིན་དེའི་ནུབ་མོར་འབྲུག་བསམ་རྩེ་རྫོང་དུ་བསྡད། དེའི་ཕྱི་ཉིན་ཕུན་ཚོགས་གླིང་བརྒྱུད་ནས་ཐིམ་ཕུག་ཏུ་ཕྱིན་ཅིང་། ཕུན་ཚོགས་གླིང་ནས་ཁོ་མོའི་གཅེན་མོ་པདྨ་དང་། མོའི་བུ་མོ་གཉིས་བསུ་བར་སླེབས་པ་ལ་ཨ་རི་ནས་ཆེད་དུ་ཉོས་པའི་རྔན་པ་འགའ་སྤྲད་ཅིང་། ཕྱིར་ཡོང་བའི་ལམ་ཁར་ཁོ་མོའི་ཁྱིམ་དུ་ཞག་སྡོད་བྱེད་རྒྱུ་ཁས་བླངས། བསམ་རྩེ་ནས་ཐིམ་ཕུག་གི་བར་ལམ་ཐག་ཤིན་ཏུ་རིང་བས། ཞོགས་པའི་ཆུ་ཚོད་དགུ་པར་ལམ་ལ་ཆས་ཀྱང་ཐིམ་ཕུག་ཏུ་ས་རུབ་རྗེས་མ་གཏོགས་སླེབས་མ་སོང་། ས་རུབ་རྗེས་ང་བསུ་མི་རྣམས་ཀྱི་ཁྱིམ་དུ་ཁྱུག་ཙམ་རེ་ཕྱིན་ཅིང་། དེ་ནས་ངའི་སེམས་གཏིང་གི་གྲོགས་པོ་གཞི་སྤྲུལ་ཆོས་ཉིད་རང་ཤར་རིན་པོ་ཆེའི་བླ་བྲང་ཏུ་ཕྱིན། མཁན་རིན་པོ་ཆེ་འཇུ་བསྟན་སྐྱོང་ཡང་དེར་ཕེབས་འདུག་པས་ང་ཚོ་མཚན་མོ་ཕྱི་བོའི་བར་དུ་ཅོལ་སྒྲོས་མོལ་སྒྲོས་སྣ་ཚོགས་གླེང་ནས་བསྡད་པ་དང་། ཁོ་མོའི་ཁ་པར་སླེབས་པ་ལ་སང་ཉིན་ཐུག་རྒྱུའི་ས་ཆ་དང་དུས་ཚོད་གཏན་ཁེལ་བྱས།
ཕྱི་ཚེས་༢ཉིན་གྱི་ཞོགས་པར་རིན་པོ་ཆེའི་བླ་བྲང་ནས་ཞོགས་ཟས་ཟོས་རྗེས། མཁན་རིན་པོ་ཆེ་དང་མཉམ་དུ་གནུབས་ཆེན་སངས་རྒྱས་ཡེ་ཤེས་ཀྱི་བསམ་གཏན་མིག་སྒྲོན་གྱི་འགྲེལ་བའི་ནང་གི་ཧ་ཤང་གི་སྐོར་དང་། གནས་ལུགས་མཛོད་ཀྱི་ནང་གི་ཧ་ཤང་གི་སྐོར། བསྒོམ་རིམ་བར་བ་སོགས་ལ་བགྲོ་གླེང་ཞིབ་ཚགས་པོ་བྱས་ནས་ཉིན་གུང་བར་འགོར། དེ་ནས་ཁོ་མོས་ལག་འཛིན་ཁ་པར་བརྒྱུད་དེ་ཁོ་མོ་ལམ་ལ་ཆས་རན་གྱི་ཡོད་པའི་གློག་འཕྲིན་སླེབས་པས། གུང་ཟས་སྟབས་བདེ་ཞིག་ཟོས་ནས་མཁན་རིན་པོ་ཆེ་དང་། རིན་པོ་ཆེའི་བླ་བྲང་གི་ཞབས་ཞུ་བས་བསྐྱལ་བ་ལྟར་དལ་མོ་བྱས་ནས་མིག་དམར་མགྲོན་ཁང་དུ་ཕྱིན། མགྲོན་ཁང་གི་ཁང་མིག་༡༠༣ལ་བསྡད་པས་ཞག་གཅིག་ལ་ཧིན་སྒོར་བཞི་སྟོང་ལྔ་བརྒྱ་རེད་འདུག སྔར་༡༩༩༨ལོར་ཐེ་ལན་ཌི་དང་ཐེ་ཝན་སོགས་སུ་འགྲོ་སྐབས་སངས་རྒྱས་འོད་ཟེར་རི་བོའི་དགོན་པས་འགྲོ་གྲོན་བཏང་བ་ལྟར་སྐར་མ་ལྔ་ཅན་གྱི་མགྲོན་ཁང་ཁ་ཤས་ཀྱི་ནང་དུ་སྡོད་མྱོང་བ་ལས། རང་ངོས་ཀྱི་འགྲོ་གྲོན་བཏང་ནས་མགྲོན་ཁང་གོང་ཆེན་འདི་འདྲ་ཞིག་གི་ནང་དུ་བསྡད་པ་དང་པོ་ཡིན། ཁོ་མོས་ང་ལ་མགྲོན་ཁང་དཀྱུས་མ་ཞིག་ལས་གོང་ཆེན་ཞིག་མ་ལེན་ཞེས་གདམས་པ་དང་། ང་ལ་ཡང་མི་དྲག་ཕྱུག་པོའི་ཨོ་ཟོབ་བསྟན་འདོད་མེད་པས་མགྲོན་ཁང་དཀྱུས་མ་ཞིག་ལ་སྡོད་བསམ་ཡང་ཁང་མིག་འདི་ལས་མ་རག་པས་འདིར་སྡོད་དགོས་བྱུང་།
མགྲོན་ཁང་དུ་སླེབས་རྗེས་མཁན་རིན་པོ་ཆེ་དང་བླ་བྲང་གི་ཞབས་ཞུ་བ་གཉིས་ཕྱིར་ཕེབས་སོང་། དེ་ནས་ངས་ལུས་ཁྲུས་བྱས་རྗེས་ཉིན་མང་པོར་མ་བཀྲུས་པའི་ནང་འཇམ་དང་། གསང་དོར། ཨུ་སུག་རྣམས་བཀྲུས་ཏེ་སྐམ་དུ་བཅུག་པ་སོགས་བྱས་པས་ཉིན་རྒྱབ་ཆུ་ཚོད་གཉིས་པ་ཟིན། དེ་ནས་ཁོ་མོས་ཁ་པར་སླེབས་ཏེ་ཁོ་མོ་ད་ལྟ་གླ་འཁོར་གྱི་ནང་དུ་ཡོད་པ་དང་། ཆུ་ཚོད་བཞི་པ་ཡར་མར་ཙམ་ལ་ཐིམ་ཕུག་ཏུ་སླེབས་ཐུབ་ཀྱི་རེད་ཟེར། དེས་ན་ད་དུང་ཁོ་མོ་སླེབས་པ་ལ་ཆུ་ཚོད་གཉིས་འགོར་གྱི་ཡོད་སྟབས་དེའི་བར་ལ་ངལ་གསོ་བྱས་ཏེ་གཉིད་འདོད་བྱུང་བས་གཞོག་གཡས་པ་ས་ལ་ཕབ་ནས་གཉིད་པ་ཡིན། ཆུ་ཚོད་གཅིག་དང་ཕྱེད་ཙམ་ལ་གཉིད་ཁུག་རྗེས་ཉམས་དང་རྨི་ལམ་འདྲེས་མའི་སྣང་བར། ངའི་ལག་པ་གཡོན་པར་ཆར་གདུགས་སྔོ་ཁྲ་ཞིག་བཟུང་ནས་འདུག་པ་ལ། རྒྱབ་ནས་མི་ཞིག་གིས་ཆར་གདུགས་ལ་འཐེན་པས། ཆར་གདུགས་ཀྱི་རྩིབ་མས་ལག་ནང་དུ་ཅུང་ཚ་རྒྱུ་ཞིག་བཟོས་པའི་སྣང་བ་ལས་གཉིད་ཕྱེད་ཙམ་སད་ཅིང་། སྐབས་དེར་རང་ཉིད་མགྲོན་ཁང་གི་ཉལ་ཁྲིའི་ཐོག་ལ་ཉལ་ཡོད་པ་ཡང་གསལ་བོར་དྲན་བྱུང་། འོན་ཀྱང་གཉིད་ཡོངས་རྫོགས་སད་མ་ཐུབ་པས་སེམས་སུ། ཨ་ཁ་ཁ། མོ་ཁྱིམ་དུ་སླེབས་ནས་ང་ལ་ཀུ་རེ་བྱེད་ཀྱི་ཡོད་པར་ཐག་ཆོད་ཀྱང་། ང་ད་དུང་སད་མི་ཐུབ་པས་ངོ་ཚ་སྙམ་གཉིད་སད་པའི་ཐབས་ཤེས་གང་དྲག་བྱས་པས་གཉིད་སད་སོང་། དེ་ནས་ཁོ་མོ་ངའི་རྒྱབ་ཏུ་སླེབས་ཡོད་ཤག་གིས་འཕྲལ་དུ་ཁ་ཕྱིར་འཁོར་བས་ཅི་ཡང་མི་འདུག་སྟབས་གཞི་ནས་རྨི་ལམ་ཡིན་པར་ཤེས། འོན་ཀྱང་བསམ་བློ་ཞིག་བཏང་བས་ཁོ་མོ་སླེབས་རན་ཡོད་པ་དང་། གསང་བ་སྙིང་ཐིག་གི་སྲུང་མས་ང་ལ་གྲ་སྒྲིག་དགོས་པའི་སྐུལ་མ་བཏང་བ་ཡིན་ཤས་ཆེ་སྙམ་འཕྲལ་དུ་ཡར་ལངས་ནས་གདོང་བཀྲུས་ཏེ་ཡག་བཏོད་པ་དང་། སྐྲ་གཙང་མར་ཤད་ནས་ཁ་བཏགས་གྲ་སྒྲིག་བྱས། དེ་ནས་ངས་ཁ་པར་གཏང་བས་ད་སླེབས་གྲབས་ཡོད། འཁྲིས་སུ་སླེབས་པ་དང་ཁ་པར་གཏོང་ཡོང་ཟེར། འོན་ཀྱང་ཡུན་རིང་ཙམ་ལ་སྒུག་ཀྱང་ད་དུང་མ་སླེབས་སྟབས་ཡང་བསྐྱར་ཁ་པར་བཏང་བས། ད་ལྟ་ཐིམ་ཕུག་གི་ཚོང་ཁྲོམ་དུ་ཡོད། ཅ་ལག་ཅིག་ཉོས་ནས་འཕྲལ་དུ་སླེབས་ཡོང་ཟེར། དེ་ནས་ཅང་མ་འགོར་བར་ང་ཡར་ལངས་ཏེ་སྒེའུ་ཁུང་ནས་ཕྱི་ལོགས་སུ་བལྟ་བཞིན་པར། གླ་འཁོར་སྔོན་པོ་ཆུང་ཆུང་ཞིག་མགྲོན་ཁང་གི་རྒྱལ་སྒོའི་ཐད་དུ་བསྡད་སོང་བ་དང་། དེའི་ནང་ནས་མོ་རང་ཕྱི་ལོགས་སུ་བབས་བྱུང་། མོས་གོས་ཐུང་སྔོ་སྐྱ་དང་སྟོད་ཐུང་ནག་པོ་ཞིག་གྱོན་ཞིང་། ཁུག་མ་སྨུག་པོ་ཆུང་ཆུང་ཞིག་ལག་ཏུ་བཟུང་འདུག དེ་ནས་མོས་ང་ལ་ཁ་པར་བཏང་སྟེ། ཧ་ནེས། ཁང་མིག་ག་པ་ལ་ཡོད་ཟེར། ངས་ཁྱེད་རང་མཐོང་སོང་། ཁང་མིག་༡༠༣པ་ལ་ཡོད་ཅེས་ལབ་པ་ཡིན། སྒོ་འགྲམ་དུ་སླེབས་ནས་སྒོ་བརྡུངས་པ་དང་ངས་སྒོ་ཕྱེས། སྔར་ངེད་གཉིས་ཀྱིས་དྲ་ལམ་ནས་སྐད་ཆ་བཤད་སྐབས། མོས་ང་དང་ག་དུས་ཐུག་ཀྱང་ཐུག་མ་ཐག་ཏུ་ཨ་རི་བའི་འོ་བསྐྱལ་བ་ལྟར་ངའི་སྐེ་ལ་འཐམ་ནས་འཇིབ་འཇོག་གི་ཡིན་ཟེར་ཡང་། དངོས་སུ་ཐོག་མར་ངོ་ཐུག་སྐབས་མོས་དེ་ལྟར་རང་བྱེད་ནུས་མ་སོང་། དེ་ནས་ངས་སྔར་ནས་གྲ་སྒྲིག་བྱས་པའི་ཁ་བཏགས་མོའི་མགུལ་དུ་གཡོགས་པ་དང་མོས་ཀྱང་ངའི་སྐེ་ལ་ཁ་བཏགས་གཡོགས་རྗེས་གཞི་ནས་སྐེ་ལ་འཐམ་མགོ་བརྩམས།
ཆུ་ཚོད་བརྒྱད་པར་མགྲོན་ཁང་གི་འོག་ཏུ་ཁ་པར་བཏང་སྟེ་འབྲུག་ལུགས་ཀྱི་ནུབ་ཟས་མངགས་པ་དང་། ནུབ་ཟས་ལ་འབྲས་དང་ཚོད་མ་སྡེར་མ་ཁ་ཤས་སླེབས། འདི་ནི་ངེད་གཉིས་མཉམ་དུ་འཛོམས་ནས་ཁ་ཟས་ལ་རོལ་བ་དང་པོ་ཡིན་པས། ངས་སྙིང་ཐིག་གི་ཚོགས་མཆོད་མདོར་བསྡུས་པ་ཞིག་བྱས་རྗེས། ཟས་ཀྱི་ཕུད་རྣམས་ཁེམ་བུས་བླངས་ནས་ཁོ་མོའི་ཞལ་དུ་བཅུག་པ་དང་དེ་རྗེས་རང་གིས་ཟོས། ཆུ་ཚོད་བཅུ་པ་ཡར་མར་ཞིག་ལ་ཉལ་བ་ཡིན། ནམ་གུང་ཆུ་ཚོད་གསུམ་པ་ཡོལ་ཙམ་ལ་ང་གཉིད་སད་བྱུང་བས། མགྲོན་ཁང་གི་གློག་ཆེན་པོ་རྣམས་བསད་ཡོད་ཀྱང་སྒོ་ཁང་དུ་གློག་ཆུང་ངུ་ཞིག་ཡོད་པ་བསད་མེད་སྟབས་ཁྱིམ་ནང་ཡོངས་རྫོགས་ཉིན་མོ་ལྟར་དུ་མཐོང་། ངས་གཞོག་གཡས་པ་ས་ལ་ཕབ་ནས་ཉལ་ཡོད་པ་ཉལ་སྟངས་ཤིག་གིས་རྩིབ་མ་ཤིན་ཏུ་ན་བཞིན་འདུག་པས། གཞོག་གཡས་གཡོན་བརྗེ་འདོད་ཀྱང་ཁོ་མོའི་མེ་ཏོག་ལྟར་མཛེས་པའི་ཞལ་རས་ང་ལ་ཕྱོགས་ཏེ་མཛུམ་མདངས་ཕྲ་མོ་ཞིག་དང་མཉམ་དུ་གཉིད་ཁུག་འདུག་པས་རྒྱབ་གཏོད་ནས་ཉལ་མ་ཕོད། ཡིན་ན་ཡང་རྩིབ་མ་ན་དྲགས་པས་དལ་མོར་ཡར་ལངས་ཏེ། མགྲོན་ཁང་ནང་དུ་ཇ་བཟོ་བྱེད་ཀྱི་གློག་ཆས་འདུག་པ་སྤྱད་ནས་ཇ་བཟོས་པ་དང་དྲ་རྒྱ་བསྔོགས་ཏེ་ཆུ་ཚོད་གཅིག་ལྷག་ཙམ་ལ་བསྡད། དེ་ནས་ཡང་གཉིད་དུབ་པས་ཉལ་སའི་ནང་དུ་ཕྱིན། ཁོ་མོ་ད་དུང་གཉིད་སད་མེད་པས་སྔར་ལྟར་ང་ལ་ཆེད་དུ་མཛེས་སྡུག་གི་ཉམས་བསྟན་པ་ལྟ་བུ་ཞིག་བྱས་ནས་གཉིད་འདུག དེ་ནས་ངས་སྐར་མ་བཅུ་གྲངས་ཙམ་ལ་ངོམ་པ་མེད་པར་ཁོ་མོའི་གདོང་ལ་བལྟས་རྗེས། ཨ་མ་མ། མི་ལོ་ཧྲིལ་པོ་གཅིག་མ་འགོར་ཙམ་གྱི་རིང་ལ་འཛམ་གླིང་ཤར་ནུབ་ཀྱི་བར་ནས་བརྩེ་དུང་གི་མདུད་པ་ཧ་ཅང་དམ་པོས་མཉམ་དུ་བསྡམས་པའི་བུ་མོ་དེ་དང་དོ་དགོང་འདི་ལྟར་དངོས་སུ་ཐུག་པ་ནི། ངས་ནམ་རྒྱུན་མོ་རང་དྲན་དྲགས་པའི་རྐྱེན་གྱིས་ང་ལ་རྨི་ལམ་བཏང་བ་འདྲ་ཡིན་མི་ཡོང་ངམ་སྙམ་སྟེ་རང་གི་ལག་པ་དང་། གདོང་པ་ལ་སེན་བཏོག་འགའ་བྱས་པས་རྨི་ལམ་མིན་པར་ཁོ་ཐག་ནང་ནས་ཆོད། དེ་ནས་ངས་ཁོ་མོའི་ཕྱག་གཡས་པ་དལ་མོར་བླངས་ཏེ་རང་གི་སྙིང་ཁ་ལ་སྦྱར་རྗེས། སྐྱབས་གནས་བསླུ་བ་མེད་པའི་དཀོན་མཆོག་རིན་པོ་ཆེ་རྣམ་པ་གསུམ་དང་། རང་གི་ཡི་དམ་ལྷག་པའི་ལྷ་དང་། རྡོ་རྗེའི་ཆོས་སྐྱོང་བའི་སྲུང་མ་རྣམས་ལ་གསོལ་བ་རྩེ་གཅིག་ཏུ་བཏབ་སྟེ། ཚེ་རབས་འདི་དང་ཚེ་རབས་གཞན་རྣམས་སུ་ཁོ་མོ་དང་དུས་ནམ་ཡང་མི་འབྲལ་བའི་སྨོན་ལམ་དང་ཕྲིན་བཅོས་བྱས་རྗེས་ཡང་བསྐྱར་གཉིད་ཁུག་པ་ཡིན།
དེའི་ཕྱི་ཉིན་སྔ་དྲོའི་ཆུ་ཚོད་བཅུ་གཅིག་དང་ཕྱེད་ཀྱི་སྟེང་ངེད་གཉིས་མགྲོན་ཁང་ལས་ཐོན་ཏེ་ཐིམ་ཕུག་དུ་འཁྱམས་ཉུལ་གང་མཚམས་བྱས་པ་དང་། དགོང་མོར་གླ་འཁོར་ཞིག་ལ་བསྡད་ནས་མོ་རང་གི་སྡོད་གནས་པུ་ན་ཁ་རུ་སོང་། ཐིམ་ཕུག་ནས་པུ་ན་ཁ་བར་གླ་འཁོར་གྱིས་ཆུ་ཚོད་གཉིས་འགོར་གྱི་འདུག་ཅིང་། ལམ་ཁ་ནི་རི་ལམ་ཁོ་ན་ཡིན་ཞིང་སྦྲུལ་གྱི་ཁྱུག་འགྲོས་ལྟར་ཀྱག་ཀྱོག་ཧ་ཅང་ཆེ་བའི་ཁར། མོ་ཊ་གཏོང་མཁན་དེ་ཡང་མོ་ཊ་སྨྱོ་གཏོང་བྱེད་པ་ལ་སྐད་གྲགས་ཡོད་མཁན་ཞིག་རེད་འདུག་པས། བརྡབ་ལ་ཁད་དང་མཆོང་ལ་ཁད་བྱས་བྱས་པའི་རྗེས་སུ་ས་རུབ་ནས་ཅུང་འགོར་རྗེས་ཁྱིམ་དུ་སླེབས་སོང་།
དེ་ལྟར་ཕྱི་ཟླ་༤ཚེས་༢ནས་བཟུང་ཚེས་༢༥བར་ཉིན་ཉེར་བཞིའི་རིང་ཁོ་མོ་དང་ཞག་གཅིག་ཀྱང་མ་བྲལ་བར་མཉམ་དུ་བསྡད་ཅིང་། ཁོ་མོའི་ནར་མའི་ཀུན་སྤྱོད་ནི། ཞོགས་པར་ཡར་ལངས་ཏེ་གདོང་དང་སོ་བཀྲུས་རྗེས་ཆུ་མཆོད་བཤམས་པ་དང་། དེ་ནས་བདུག་སྤོས་སྦར་རྗེས་རྨ་བྱའི་སྒྲོའི་ཁ་རྒྱན་ཅན་གྱི་བུམ་ཆུས་མཆོད་པ་རྣམས་ལ་ཆབ་བྲན། དེ་ནས་ཞོགས་ཇ་འཐུང་ཞིང་། ཆུ་ཚོད་དགུ་པ་ཟིན་སྐབས་ལས་ཁུངས་སུ་འགྲོ། དགོང་མོར་ནུབ་ཟས་ཟོས་རྗེས་ཆུ་མཆོད་གཤེགས་ཤིང་། བདུན་ཚར་རྣམས་བསིལ་སྐམ་གྱི་ཆེད་དུ་ཁ་སྦུབ་སྟེ་ཐོག་བརྩེགས་བྱས་ནས་འཇོག ཉལ་ཁར་ལག་པ་དང་སོ་གཙང་མས་བཀྲུ་བ་ལས་ལུས་ཁྲུས་ནི་ཉིན་མང་པོའི་ནང་ལ་ཐེངས་རེ་ལས་བྱེད་་ཀྱི་མི་འདུག་པས་ཕལ་ཆེར་ལེ་ལོ་བྱེད་གི་ཡོད་པ་འདྲ། ཉི་མ་རེ་རེ་བཞིན་ཁོ་མོ་ཞོགས་པར་ལས་ཁུངས་སུ་འགྲོ་སྐབས། ངས་ཁོ་མོའི་སྐྲ་ཤད་པ་དང་། རྒྱ་སེའི་མེ་ཏོག་གི་འདབ་མ་ལྟར་འཇམ་པའི་རྐང་པ་ཆུང་ཆུང་གཉིས་ལ་རེས་མོས་ཀྱིས་འོ་བསྐྱལ་བཞིན་ལྷྭམ་བསྐོན་རོགས་བྱེད་ཀྱི་ཡོད་ཅིང་། འབྲུག་པའི་ལུགས་སྲོལ་ལ། ལས་ཁུངས་ནང་དུ་འགྲོ་སྐབས་Tegoཟེར་བའི་འབྲུག་ལུགས་ཀྱི་སྟོད་གོས་དང་། Kiraཟེར་བའི་སྨད་གཡོག་དེ་གཉིས་མ་གྱོན་པར་འགྲོ་མི་ཆོག་པས། དགུང་མོ་ལས་ཁུངས་ནས་སྤྱིར་སླེབས་སྐབས་ཁོ་མོའི་སྟོད་གོས་དང་། སྨད་གཡོག་རྣམས་བླངས་ཏེ་ལྟེབ་བརྩེགས་ལེགས་པར་བརྒྱབས་ནས། ལུས་ཀྱི་དྲོད་མ་ཡལ་བའི་གོན་པ་དེ་དག་དཔྲལ་བ་ལ་གཏུགས་ཅིང་འོ་བསྐྱལ་རྗེས། ཆ་སྒམ་སྟེང་དུ་སང་ཉིན་གྱོན་ཆོག་ཆོག་བྱས་ཏེ་འཇོག་གི་ཡོད། འདི་ནི་ངས་ངོས་ནས་ཁོ་མོའི་ང་ལ་བཅང་བའི་རིན་ཐང་གཞལ་མེད་ཀྱི་བརྩེ་བ་ལ་དུང་པའི་ལན་ཕུལ་བའི་ཕྱིའི་རྣམ་འགྱུར་ཙམ་དང་། གཅིག་བྱས་ན་མ་འོངས་པར་ངའི་མི་ཚེ་ཁོ་མོའི་ཕྱག་ཏུ་ཕུལ་རྒྱུའི་ལས་འཕྲོ་ཡོད་སྲིད་ཀྱང་། འཛམ་གླིང་ཤར་ནུབ་ཏུ་སོ་སོ་བྱས་ནས་སྡོད་པ་འདི་ལས་བར་ཆད་ཆེ་བ་ཞིག་མེད་པས། ཡང་གཅིག་བྱས་ན་ད་རེས་ཀྱི་ཚེ་འདི་ལ་དེ་ཙམ་ལས་ཨེ་མཇལ་ཡང་མི་ཤེས་སྙམ་སྟེ། གསེར་ལས་རྩ་ཆེ་བའི་དུས་ཚོད་དམ་འཛིན་བྱས་པ་ཙམ་ཞིག་ལས། ངའི་སེམས་ནང་གི་བརྩེ་དུང་ངོ་མ་ནི་ང་རང་གི་ཚོད་ཀྱིས་བརྗོད་ལས་འདས་པ་ཞིག་ཡིན་པས་འདི་དང་འདི་འདྲའོ་ཞེས་ཡི་གེའི་རིས་སུ་ངེས་པར་དུ་ཕབ་ཐུབ་ཀྱི་མེད།
ཁོ་མོ་ཟས་ལ་སྲེད་པ་ཆེན་པོ་མེད་མཁན་ཞིག་རེད་འདུག་པས། ནམ་རྒྱུན་ཁ་ཟས་ཤིན་ཏུ་ཉུང་ངུ་ཞིག་ལས་མི་ཟ། དེར་བརྟེན་ང་རྒྱུན་དུ་ཁྲོམ་ལ་སོང་སྟེ་བོད་ལུགས་ཀྱི་ཐུག་པ་དང་། མོག་མོག་སོགས་བཟོ་བའི་རྒྱུ་ཆ་འགའ་ཞིག་དང་། ཞོགས་ཟས་ཀྱི་ཆེད་དུ་འོ་མ་དང་མ་རྨོས་ལོ་ཏོག་སྐམ་པོ། རྒུན་འབྲུམ་སྐམ་པོ་སོགས་ཉོས་ཤིང་། ངས་བཟོས་པའི་ཐུག་པ་དང་མོག་མོག ཞོགས་པར་འོ་མ་བསྐོལ་བ་རྣམས་ཁོ་མོས་མང་ཙམ་རེ་བཟའ་འཐུང་བྱེད་པ་མཐོང་དུས་ངའི་སེམས་ལ་དགའ་ཚོར་ཆེན་པོ་སླེབས་ཤིང་། ཉུང་ཙམ་རེ་ལས་མ་ཟོས་དུས་ངས་ཁྱོད་ལ་རྔན་པ་འདི་ཡིན་ཟེར་བ་ཞིག་བསྐུར་ཡོང་ཞེས་ཨུ་ཚུགས་བརྒྱབ་ནས་ཟ་རུ་འཇུག་གི་ཡོད། ཐེངས་ཤིག་ཁོ་མོར་ཆམ་པ་ཞིག་ཕོག་སྟེ་ཚ་བ་འཕར་ཞིང་མིད་པ་ན་བ་སོགས་བྱས་པས། གུང་ཟས་དང་ནུབ་ཟས་གཉིས་ཀ་ཟ་རོགས་མ་བྱས་སྟབས་ང་ངུས་པ་ཡིན། དེ་ནས་མོས་ཨུ་ཚུགས་བརྒྱབ་ནས་ཐུག་པ་ཕོར་བ་ཆེན་པོ་གང་འཐུང་སོང་བ་དང་། ལག་པ་གཉིས་ཀྱིས་ངའི་འགྲམ་པ་བསྐྱོར་ཏེ་འོ་བསྐྱལ་རྗེས། ཧ་ནེས། ཐུགས་རྗེ་ཆེ། ངས་ནམ་ཡིན་རུང་ཁྱེད་རང་གི་ཐུགས་བརྩེ་བརྗེད་ཀྱི་མ་རེད་ཟེར་ནས་ཁོ་མོས་ཀྱང་སྤྱན་ཆབ་བསིལ་བྱུང་།

པུ་ན་ཁ་རུ་སྡོད་པའི་རིང་འཆི་མེད་ལྷ་ཁང་དང་། རྡོ་རྒྱ་གར་བླ་མ་ཟེར་བ་གྲུབ་ཆེན་ནག་པོ་བས་རང་གི་མ་ཡུམ་ངན་སོང་ལས་དྲངས་པའི་གནས་སོགས་ལ་གནས་མཇལ་བྱས་ཤིང་། པུ་ན་ཁ་དང་དབང་འདུས་རྫོང་གི་གཡས་གཡོན། ཐིམ་ཕུག་གི་ས་གནས་གྲགས་ཆེན་འགའ་ཞིག་ལ་ཡང་ངེད་གཉིས་མཉམ་པོར་བལྟ་སྐོར་དུ་ཕྱིན། སྐབས་འདི་དག་གི་རིང་སྔར་མེད་ཀྱི་ཉམས་རྟོགས་ཕྲན་བུ་རེ་བྱུང་བ་རྣམས་ནི་ནང་གི་ལོ་རྒྱུས་སུ་གསལ་ཞིང་། ཚེས་༡༨ཉིན་གྱི་ཐོ་རངས་ལ་གཉིད་དང་འོད་གསལ་འདྲེས་པའི་སྣང་ཆར། བུ་མོ་འདིའི་ཞབས་བརྟན་ལྟ་བུ་ཤོ་ལོ་ཀ་གཉིས་ཡོད་པ་ཞིག་ཤར་ཡང་། ཆུ་ཚོད་ཁ་ཤས་འགོར་རྗེས་ཚིག་ནི་གཅིག་ཀྱང་དྲན་གྱི་མི་འདུག འོན་ཀྱང་དོན་ནི་སངས་རྒྱས་ཚེ་མཐའ་ཡས་དང་། འཆི་མེད་ཚེ་ཡི་རིག་འཛིན་བརྙེས་པ་པདྨ་འབྱུང་གནས་སོགས་ཚེ་ཡི་ལྷ་ཚོགས་རྣམས་ཀྱི་བདེན་པའི་སྟོབས་ཀྱིས། གསང་བདག་བདེ་ཆེན་དཔའ་བོའི་ཐབས་གྲོགས་སུ། ཌཱཀྐི་ཆོས་སྐྱིད་དབང་མོའི་སྐུ་ཚེ་ཡུན་དུ་བརྟན་པར་ཤོག་ཟེར་བ་དེ་འདྲ་ཞིག་ཡིན་པ་གསལ་བོར་དྲན་པས། འོད་གསལ་གྱི་ཤར་ཆ་དེ་དང་མཐུན་པར། ཧྲཱིཿ རྒྱལ་ཀུན་གསུང་གི་དབང་ཕྱུག་ཚེ་མཐའ་ཡས།། ཚེ་དབང་རིག་འཛིན་པདྨ་རྒྱལ་པོའི་སྐུ།། ཚེ་ཡི་ཡེ་ཤེས་མཁའ་འགྲོ་མནྡ་ར།། ཚེ་ཡི་རིག་འཛིན་རྒྱ་མཚོའི་བྱིན་མཐུ་ཡིས།། གསང་བདག་བདེ་ཆེན་དཔའ་བོའི་ཐབས་ཀྱི་གྲོགས།། ཚེ་འཛིན་ཌཱཀྐི་ཆོས་སྐྱིད་དབང་མོ་ཡི།། སྐུ་ཚེ་མི་ཤིགས་རྡོ་རྗེའི་ཁམས་སུ་བརྟན།། ཕྲིན་ལས་སྣང་བས་ས་གསུམ་ཁྱབ་པར་ཤོག། ཅེས་པ་འདི་ཡང་རྟེན་འབྲེལ་གྱི་ཆེད་དུ་ཤར་མར་བྲིས་ཤིང་། ཕྱིས་སུ་སྤ་གྲོ་སྟག་ཚང་ནས་སློབ་དཔོན་རིན་པོ་ཆེའི་སྐུ་བརྙན་གྱི་མདུན་དུ་སྙན་གསན་ཕུལ།

སྤྱིར་འབྲུག་པའི་བུ་མོ་རྣམས་ཀུན་སྤྱོད་འཇམ་པའི་ཁར། བུ་མོ་འདིའི་གཤིས་ཀ་དང་སྤྱོད་ལམ་ནི་མི་ལས་འདས་ནས་ལྷ་ཡི་གྲལ་དུ་སླེབས་པ་ལྟ་བུ་ཞིག་འདུག་སྟེ། ཁོ་མོའི་ཨ་མ་དང་གཅེན་མོ་སོགས་ཀྱིས་ཟེར་ན། བུ་མོ་འདི་ལས་ལྷག་པའི་གཤིས་ཀ་དང་སྤྱོད་ལམ་བཟང་པོ་ཅན་ཤིན་ཏུ་དཀོན་ཞིང་། སྐྱེས་ནས་ད་བར་རང་གཞན་སུ་ལ་ཡང་རྒྱག་རེས་རྒྱག་པ་དང་། ཁོང་ཁྲོ་བསྟན་པ། ཚིག་ངན་སྨྲ་བ་ཞིག་མཐོང་མྱོང་མེད་ཟེར། སྤྱིར་བཏང་ཁྱིམ་གང་པོའི་མི་རྣམས་ཀྱི་སེམས་ཀྱི་ཞི་བདེ་ལ་ཡིད་སྨོན་ཐེངས་དགུ་ཤོར་འོས་པ་ཞིག་འདུག་ཅིང་། ཁྱིམ་འདིར་གཅེན་གཅུང་མིང་སྲིང་བདུན་འདུག་པ་ལས་བུ་མོ་འདི་ནི་ཁྱིམ་མི་ཡོངས་རྫོགས་ཀྱི་ཁོག་པའི་ནང་གི་སྙིང་གཅིག་པུ་དེ་རེད་འདུག དེས་ན་བུད་མེད་དམ་པ་འདི་འདྲ་ཞིག་དང་ཐུག་པ་ཙམ་ཡང་ང་ལྟ་བུ་ཁ་རྗེ་དབང་ཐང་ཆུང་ཞིང་། མི་སེམས་འགུག་བྱེད་ཀྱི་རྒྱུ་ནོར་དང་འཇོན་ཐང་གང་ཡང་སྟོན་རྒྱུ་མེད་པའི་མི་ཞིག་མཚོན་ན། ཚེ་གཅིག་གི་ནང་ངོམ་རིམ་ཆོག་པའི་གཟི་བརྗིད་ཅིག་ཏུ་བརྩི་བར་འོས་པ་ལས། དུས་གཏན་དུ་ང་ལ་དབང་བར་འདོད་པ་ནི་བོང་བུའི་མགོ་ལ་གསེར་སྲབ་རང་ཡིན་པས། རི་ལས་ཆེ་བའི་ཧམ་སེམས་དེ་འདྲ་བཅང་རྒྱུའི་བློ་སྤོབས་ཤིན་ཏུ་ཞན་རུང་། ཁོ་མོ་རང་གི་ངོས་ནས་ང་དང་གཏན་དུ་མི་འབྲལ་བའི་དབུ་མནའ་བཞེས་ཤིང་། ཕྱི་ཚེས་༡༧ཉིན་འབྲུག་སྨྱོན་ཀུན་དགའ་ལེགས་པས་བཞེངས་པ་བྱིན་རླབས་ཆེས་ཆེ་བར་གྲགས་པའི་འཆི་མེད་ལྷ་ཁང་དང་། ཚེས་༢༤ཉིན་སློབ་དཔོན་རིན་པོ་ཆེ་གུ་རུ་རྡོ་རྗེ་གྲོ་ལོད་ཀྱི་སྐུར་བཞེངས་པའི་གནས་མཆོག་སྤ་གྲོ་སྟག་ཚང་གི་ལྷ་ཁང་རྣམས་སུ་ང་ཁྲིད་དེ། སྟོན་པ་ཐུགས་རྗེ་ཅན་དང་། སློབ་དཔོན་རིན་པོ་ཆེ་སོགས་ཀྱི་སྐུ་བརྙན་གྱི་མདུན་ནས་ཁོ་མོའི་མི་ཚེ་འདི་དང་། ཚེ་རབས་གཞན་རྣམས་སུ་ཡང་ང་དང་ཁ་མི་འབྲལ་བའི་སྨོན་ལམ་ཀྱང་དངོས་སུ་གནང་སོང་བས། ངས་ཀྱང་སྤྲང་པོའི་བུ་ལ་རྒྱལ་སྲིད་ཐོབ་རྒྱུའི་རེ་བ་མི་བྱེད་རང་བྱེད་ཆགས།
ཕྱི་ཚེས་༢༣ཉིན་ནས་ང་ཕྱིར་ཨ་རི་ལ་ཡོང་རྒྱུའི་གྲ་སྒྲིག་བྱས་ཤིང་། དེ་ཡང་ཚེས་༢༣ཉིན་ངེད་གཉིས་དང་ཁོ་མོའི་ཨ་མ་སོགས་མི་འགའ་ཞིག་བཅས་པུ་ན་ཁ་ནས་ཐིམ་ཕུག་ཏུ་ཡོང་བ་དང་། ཚེས་༢༤ཉིན་སྤ་གྲོ་སྟག་ཚང་དང་། སྤ་གྲོ་སྐྱེར་ཆུའི་ལྷ་ཁང་གཉིས་ལ་གནས་མཇལ་གྲུབ་རྗེས། དགོང་མོར་ཡང་ཕྱིར་ཐིམ་ཕུག་ཏུ་ཡོང་སྟེ་མོ་རང་གི་གཅེན་མོ་འབྲིང་བའི་ཁྱིམ་དུ་ཞག་སྡོད་བྱས། སྤ་གྲོ་སྟག་ཚང་དུ་གནས་སྐོར་ལ་ཕྱིན་པའི་ཐོ་རངས་ཁར་རྡོ་རྗེ་ཕག་མོ་ནག་མོའི་ཐུགས་སྒྲུབ་ཅིག་ཡིད་ཀློང་ནས་བརྡོལ་བ་ཡང་འགྲོ་དོན་ཆུང་བར་བསམ་པ་དང་། སྐབས་དེར་བྲེལ་ཟིང་གིས་མིག་སྡེབ་ལོང་མེད་པའི་སྐབས་ཤིག་ཡིན་པས་ཡིག་ཐོག་ཏུ་མ་བྲིས། ལར་ཕྱི་ལོ་༢༠༠༠ལོར་ཁོ་བོ་གནས་མཆོག་རྡོ་རྗེ་གདན་དུ་ཡོད་སྐབས། ཟླ་༡༢པའི་ཚེས་༢༡གི་དགུང་མོར། བླ་མ་དཔལ་རྡོ་རྗེ་སེམས་དཔའ་མདུན་གྱི་ནམ་མཁར་བྱོན་ཅིང་ཕྱག་གཡས་པའི་གསེར་གྱི་རྡོ་རྗེ་སྤྱི་བོར་བཞག་སྟེ། ཧཱུྂཿ ང་ནི་ནམ་མཁའི་མེ་ཏོག་སྟེཿ བརྡ་མེད་བརྡ་དང་དོན་མེད་དོནཿ རྟགས་མེད་རྟགས་གསུམ་ཡོངས་རྫོགས་པའིཿ རི་བོང་རྭ་ཡི་དབང་མཆོག་འདིཿ དེ་རིང་མོ་གཤམ་བུ་ཁྱོད་ལཿ རུལ་སྦལ་སྤུ་ཡི་ཆོ་ག་ཡིསཿ བསྐུར་བས་རང་བྱུང་རིག་པའི་གཤིསཿ མཐོང་བ་མེད་པར་མཐོང་བར་ཤོགཿ སུ་ལ་གང་གིས་དབང་བསྐུར་བྱིནཿ དབང་ནི་གང་ཞིག་བསྐུར་བར་བྱཿ ཡེ་ནས་རྫོགས་པའི་དཀྱིལ་འཁོར་ལཿ བསྐུར་དང་མ་བསྐུར་ཡོད་མ་ཡིནཿ ལྟོས་ཤིག་རིག་པའི་གཤིས་ལ་ལྟོསཿ གཤིས་ལ་སུ་ཡིས་བལྟ་བར་ལྟོསཿ ཞེས་སོགས་སྐྱེ་མེད་དོན་གྱི་དབང་མཆོག་ཟབ་མོ་ཐོབ་པར་རྨིས་པའི་མཇུག་ཐོག་དང་། ཁོ་བོའི་ཕྱིའི་ལོ་རྒྱུས་ལེའུ་དྲུག་པར་གསལ་བ་བཞིན། ༢༠༠༡ལོར་རིགས་ལྔའི་མཁའ་འགྲོའི་བརྡ་བྱང་བྱུང་བ་གཉིས་ཀ་ལས་ཚེ་འདིར་རང་ལ་ས་གཏེར་གྱི་ལས་སྐལ་ཡོད་པའི་རྟགས་མཚན་མ་བྱུང་ཞིང་། དགོངས་གཏེར་གྱི་ལས་འཕྲོ་ཡོད་པའི་རྟགས་མཚན་ཤིན་ཏུ་གསལ་བོར་བྱུང་རུང་། དེང་སང་སྐྱེ་བོ་རྣམས་གྲགས་པའི་རྗེས་འབྲང་ཁོ་ནས་འཚོ་བའི་དུས་རབས་འདིར་ང་ལྟ་བུ་ཞིག་གི་དགོངས་གཏེར་ནི་སྣག་ཤོག་དང་། རང་གི་དུས་ཚོད་གྲོན་བྱེད་ཙམ་ལས་ཅི་ཡང་མེད་པས་དེའི་ཕྱོགས་ལ་སྤྲོས་རྩོལ་བྱེད་རྒྱུའི་འདུན་པ་ཤིན་ཏུ་ཆུང་བ་ལགས། འོན་ཀྱང་སྨོན་ལམ་དབང་བསྐུར་གྱི་བརྒྱུད་པ་དུས་སུ་སྨིན་ཅིང་། མཁའ་འགྲོ་གཏད་རྒྱའི་བརྒྱུད་པས་སྡོད་དུ་མ་བཅུག་ན་ནི། དབྱར་དུས་སུ་ཆར་ཆུ་རྒྱས་པ་སུས་ཀྱང་འགོག་པར་མི་ནུས་ཤིང་། དེར་མ་ཟད་དག་སྣང་གི་ཆོས་ཡིན་ན་སྔོན་དུས་སུ་སློབ་དཔོན་རིན་པོ་ཆེས་གཏད་རྒྱ་སྔོན་དུ་སོང་བའི་ཐ་སྙད་མེད་ཀྱང་། ལས་འཕྲོ་གཏེར་གྱི་ཟླས་ཕྱེ་བའི་དགོངས་གཏེར་ཡིན་ན་སློབ་དཔོན་རིན་པོ་ཆེས་གཏད་རྒྱ་སྔོན་དུ་སོང་ངེས་པའི་ཁྱབ་པ་དང་། སློབ་དཔོན་རིན་པོ་ཆེས་གཏད་རྒྱ་སྔོན་དུ་སོང་ངེས་ན། སྔོན་དུས་སུ་སློབ་དཔོན་རིན་པོ་ཆེའི་ཞལ་ཟིན་པར་ངེས་པས་དེ་ལས་དགའ་འོས་པའི་དོན་ཞིག་གང་ན་ཡོད། ལར་གཏེར་སྟོན་རྣམས་ནི་མི་ཕལ་བ་དང་མི་འདྲ་བར། སློབ་དཔོན་རིན་པོ་ཆེ་ལས་དབང་དོན་གྱི་ཡེ་ཤེས་ཐོབ་ལ་མ་ཉམས་པར་ཡོད་པས། སློབ་དཔོན་རིན་པོ་ཆེ་ལ་རྒྱུན་དུ་རང་གི་རྩ་བའི་བླ་མ་དངོས་ཀྱི་འདུ་ཤེས་བཅོས་མིན་དུ་ཡོང་བ་ཡིན་ཞིང་། ཁོ་བོ་ཡང་རང་གི་ལོ་རྒྱུས་ལེའུ་གཉིས་པར་གསལ་བ་བཞིན། བྱིས་པ་འོ་འཐུང་གི་དུས་ནས་སློབ་དཔོན་རིན་པོ་ཆེ་ལ་རང་གི་ཕའམ། རྩ་བའི་བླ་མ་དངོས་ཀྱི་འདུ་ཤེས་བཅོས་མ་མ་ཡིན་པ་ཞིག་སུས་ཀྱང་མ་བསྐུལ་བར་རང་བྱུང་དུ་ཡོད་པ་ནི། ད་བར་སྐྱིད་སྡུག་ལེགས་ཉེས་ཅི་ཞིག་དང་འཕྲད་ཀྱང་འགྱུར་བ་མེད་པར་གནས་པ་ཡིན་ནོ།། འདི་ནི་ཞར་བྱུང་དུ་ཐལ་བ་ལགས།
གནས་མཆོག་སྤ་གྲོ་སྟག་ཚང་གི་གནས་ཀྱི་བཀོད་པ་སོགས་ནི་བློའི་ཡུལ་ལས་འདས་པ་ལྟ་བུར་སྣང་ཡང་། སྐབས་གཞན་ཞིག་ཏུ་འབྲི་བ་ལས་འདིར་ཡིག་ཚོགས་ཀྱིས་འཇིགས་པས་རྒྱས་པར་འབྲི་རྒྱུ་མིན། སྟག་ཚང་ཕུག་པའི་སྟེང་གི་ལྷ་ཁང་ཆེ་བ་ཞིག་ཏུ་འོད་དཔག་མེད་དང་། རྡོ་རྗེ་ཕུར་བ། རྡོ་རྗེ་གྲོ་ལོད་སོགས་ཀྱི་སྐུ་ཆེ་ཞིང་འབྱོན་ལེགས་པ་མང་དུ་བཞུགས་པ་ལས། གཙོ་སྐུའི་གཡས་ཕྱོགས་སུ་གུ་རུ་སྣང་སྲིད་ཟིལ་གནོན་གྱི་སྐུ་བལྟ་བས་ཆོག་མི་ཤེས་པ། ད་ལྟ་རང་གསུང་འབྱོན་ཆོག་ཆོག་ལྟ་བུ་ཞིག་བཞུགས་པའི་མདུན་དུ་ས་ལ་བསྡད་དེ། ཚིག་བདུན་གསོལ་འདེབས་ཀྱི་བླ་མའི་རྣལ་འབྱོར་ཞིག་བཏོན་པར་མཆི་མས་བརྣངས་ཆེས་ནས་ཚིག་ནི་གཅིག་ཀྱང་མ་ཐོན། སློབ་དཔོན་རིན་པོ་ཆེ་དྲན་དྲགས་པ་ལྟ་བུས་མིག་ཆུ་ཕྲེང་ཐག་ཆད་པ་ལྟར་བཞུར་གྱིན་ཤུབ་བཟླས་དང་ཡིད་བཟླས་འདྲེས་མ་བྱས་ཏེ་ཡན་ལག་བདུན་པ་སོང་ཚར་ཙམ་ཞིག་ནས། སློབ་དཔོན་རིན་པོ་ཆེ་དང་ཐུགས་ཡིད་འདྲེས་པ་ལྟ་བུར་འོད་གསལ་གྱི་ངང་དུ་འབྱམས་ཀླས་ཏེ་དུས་ཚོད་གང་ཙམ་ཞིག་འགོར་བ་ཡང་མ་ཤེས། སླར་ཐུན་ལས་ལྡང་བའི་སྐབས་སུ་ཁོ་མོ་ཡང་ངའི་གཡོན་ཕྱོགས་སུ་བཤུམས་བཞིན་བཞུགས་འདུག་ཅིང་། གཞན་འབྲུག་མོ་རྒྱག་པ་རིལ་རིལ་འགའ་ཞིག་གིས་ང་ལ་བསྐོར་ནས་བལྟས་འདུག་པས་ཅུང་སྟབས་མ་བདེ་བ་ཞིག་བྱུང་།

ཚེས་༢༥ཉིན་ཁོ་མོ་ཕྱིར་པུ་ན་ཁ་རུ་ལོག་ཅིང་། ང་དང་ང་སྐྱེལ་མི་རྣམས་ཐིམ་ཕུག་གི་མགྲོན་ཁང་གོང་ཆུང་ཞིག་ཏུ་བསྡད། ཚུར་ཡོང་རན་པ་དང་དངུལ་རྫོགས་པ་ཡང་དུས་མཉམ་བྱུང་། ཚེས་༢༦ཉིན་ཐིམ་ཕུག་ནས་ཕུན་ཚོགས་གླིང་དུ་ཡོང་ཞིང་། དེའི་དགོང་མོར་སྔར་གྱི་ཁས་ལེན་ལྟར་པདྨའི་ཁྱིམ་དུ་ཞག་སྡོད་བྱས། ཚེས་༢༧ཉིན་འབྲུག་ཕུན་ཚོགས་གླིང་ནས་རྒྱ་གར་ཤི་ལི་རྒུ་རུའི་གནམ་ཐང་དུ་ཚུར་ཡོང་དགོས་པས། ཉིན་འདི་ད་རེས་ཀྱི་འགྲིམ་འགྲུལ་འདིའི་སྐབས་སུ་འབྲུག་ལ་སྡོད་པའི་ཉིན་ཐ་མ་ཡིན། དེས་ན་ཞོགས་པ་ཤིན་ཏུ་སྔ་པོར་གཉིད་སད་ཀྱང་ད་དུང་ནམ་ལངས་མེད་པས་ཕྱིར་གཉིད་ཅུང་ཟད་ཁུག་པའི་རྨི་ལམ་ལ། སྔར་ཧ་ཅང་འདྲིས་ཆེ་བ་ལྟ་བུའི་རྒྱ་གར་གྱི་བུ་མོ་གཟུགས་རིང་ཞིང་ཡིད་དུ་འོང་བ། ཤ་མདོག་སྨུག་ཅིང་གོན་པ་སེར་པོ་གཙང་མ་འོད་འཕྲོ་བ་གྱོན་པ་ཞིག་ཞལ་ངོ་འཛུམ་གྱིས་གང་བཞིན་བྱུང་སྟེ་བོད་སྐད་ཀྱི་ཐོག་ནས། ང་ཨེ་ཤེས་གི ང་ནི་སྔར་བུ་མོ་ཆུང་ཆུང་ཡིན་དུས་ཁྱེད་ཀྱིས་ངོས་བདག་བྱས་ནས་བདག་སྐྱོང་བྱས་ཡོང་བའི་བུ་མོ་དེ་ཡིན། ད་ཆེན་པོ་ཆགས་པ་རེད་ཟེར་ནས་ང་ལ་འགྲམ་པ་གཏུགས། ངས་ཀྱང་ཕར་འགྲམ་པ་གཏུགས་ཞོར་ལ་བསམ་བློ་ཞིག་བཏང་བས། སྔར་ང་རྒྱ་གར་དུ་སྡོད་སྐབས་རྡོ་རྗེ་གདན་དུ་ཌབ་ལུ་ཀུ་མར་ཟེར་བའི་རྒྱ་གར་གྱི་བུ་ཆུང་ཞིག་ངོས་བདག་བྱས་ནས་ལོ་རེ་རེ་བཞིན་བདག་སྐྱོང་བྱས་པ་ཡིན་ཡང་། བུ་མོ་ཞིག་ངོས་བདག་བྱས་པ་དྲན་གྱི་མི་འདུག་སྟབས། ངས་ཁྱོད་དྲན་གྱི་མི་འདུག་པས་ཁྱོད་ཀྱི་མིང་ལ་ཅི་ཟེར་བ་ཡིན་ནམ་ཞེས་དྲིས་པ་ཡིན། ངའི་མིང་ལ་སྭ་ར་སྭ་སྟི་ Saraswati­ ཟེར་བ་ཡིན་ཟེར། དེས་ན་ང་ཕར་འགྲོ་ཁ་དང་ཚུར་འོང་ཁ་གཉིས་ཀར་འཕགས་མ་ཐུགས་རྗེ་ཅན་གྱི་ཐུགས་རྗེས་དགོངས་པའི་རྟགས་མཚན་ཤིན་ཏུ་གསལ་པོ་བྱུང་། ཉིན་དེའི་ཉིན་རྒྱབ་ཆུ་ཚོད་གཉིས་པར་བྷག་ཌོག་རའི་གནམ་ཐང་ནས་ཕྱིར་འཕུར་ཞིང་། སྔར་ལྟར་དྷི་ལི་དང་། བྷང་ལོར། དྷུ་པ་ཡེ་རྣམས་བརྒྱུད་ནས་ཕྱི་ཚེས་༢༨ཉིན་ནེའུ་ཡོག་ཏུ་སླེབས་པ་དང་། དེའི་ཕྱི་ཉིན་དགོང་མོའི་ཆུ་ཚོད་གསུམ་པ་ཙམ་ལ་རང་ཁྱིམ་དུ་ཕྱིར་བདེ་བར་སླེབས་སོ།།
དེ་ལྟར་ན་རེ་བ་རུམ་གང་བཟུང་ནས་འབྲུག་ལ་ཕྱིན་ཅིང་། བརྩེ་བ་རྒྱབ་གང་ཁུར་ནས་ཕྱིར་ཨ་རིར་སླེབས་པ་ནི། ད་རེས་ཀྱི་སྤྲིན་གྱི་རྒྱ་མཚོ་བརྒལ་བའི་བརྩེ་དུང་གི་འགྲུལ་བཞུད་རིང་མོའི་ཕྱིའི་ལོ་རྒྱུས་མདོ་ཙམ་ཞིག་བརྗོད་པ་སྟེ། མི་ཚེ་འདིའི་ནང་སེམས་ཀྱི་བདེ་སྐྱིད་ཆེས་ཚད་གཞི་མཐོན་པོར་སླེབས་པའི་འགྲུལ་བཞུད་ཅིག་ཀྱང་ཡིན་ནོ།།
ཕྱིར་ཨ་རིར་སླེབས་རྗེས་གཅིག་ནས་དེང་རབས་གསར་བའི་ལུགས་སྲོལ་དང་། གཉིས་ནས་སྔར་ངའི་ཁྱིམ་ཚང་ཁ་འཐོར་དུ་འགྲོ་སྐབས། རོ་ཐོག་རྟ་རྒྱུག་བྱེད་རྒྱུ་ལ་ཤིན་ཏུ་གོམས་པའི་མི་སྐོར་ཞིག་གིས། ང་ལ་སེམས་གསོའི་མཚམས་འཕྲིན་གྱི་ཚབ་ཏུ་གཞི་མེད་སྐུར་འདེབས་གང་མང་བྱས་ཏེ། བོད་ཕྱི་ནང་གང་སར་ཡོད་པའི་ངའི་ཕྱོགས་ཀྱི་མི་མང་པོ་བློ་ཕམ་དུ་བཅུག་པར་བརྟེན། བདེན་དོན་བདེན་དཔང་གི་ཐོག་ནས་ངོ་སྤྲོད་བྱེད་ཆེད། ང་དང་ངའི་སྙིང་གི་བདག་མོ་གཉིས་ཀྱི་འདྲ་པར་བཞི་བཅུ་ལྷག་ཅིག་ངོ་དེབ་ཀྱི་སྟེང་དུ་བསམ་གཟས་ནས་བཀོད་པ་ལ། མི་སུ་ཞིག་དར་ན་ཡང་ཟུག རྒུད་ན་ཡང་ཟུག རྒྱུ་མཚན་ཤེས་ན་ཡང་ཟུག རྒྱུ་མཚན་མ་ཤེས་ན་ཡང་ཟུག་པའི་གད་སྙིད་ཁྲོད་ཀྱི་ཁྱི་ལྡོམ་ལོང་བ་འགའ་ཞིག ཡང་ངུ་ཟུག་གིས་མིད་པ་འགག་གྲབས་ཡོད་པ་ཐོས་ཀྱང་། བདེན་རྫུན་དཔྱོད་པའི་བློ་གྲོས་ཀྱི་མིག་དང་ལྡན་ཞིང་། མིའི་སྤྱི་ཚོགས་ཀྱི་ནང་ནས་མི་བུ་རིན་ཐང་ཅན་དུ་གྲགས་པ་རྣམས་ཀྱིས་ང་ལ་གདེངས་འཇོག་གིས་བརྩེ་བའི་མཚམས་འཕྲིན་གནང་བ་ནི།
ཁྲག་འཐུང་བདེ་ཆེན་གླིང་པ་མཆོག་གིས།
བརྩེ་དུང་གི་དེབ་ཐེར་མེ་ཏོག་གི་རྒྱ་ཅན།།
སྦས་ཡུལ་གྱི་མཁའ་འགྲོ་བརྩེ་འདང་གི་རྐྱལ་བ།།
མདོ་སྨད་ཀྱི་དཔའ་བོ་སྙིང་སྡུག་གི་དྲན་ཤིང་།།
ལྷན་འཛོམས་ཀྱི་གཏམ་རྒྱུད་མཁའ་ཁྱབ་ཀྱི་རོལ་མོ།། ཞེས་སོགས་སྔ་ཕྱི་བར་གསུམ་དུ་ཚིག་སྙན་ཞིང་དོན་ཟབ་པའི་མཚམས་འཕྲིན་གང་མང་གནང་བ་དང་། ༧སྐྱབས་རྗེ་མཁན་ཆེན་བླ་མ་དཔལ་དགྱེས་པ་རྡོ་རྗེ་མཆོག་གིས། ཨེ་མ་ཧོ།འཇིགས་མེད་མདོ་སྔགས་ཤེས་བྱའི་གཏེར་ཆེན་ཀུན།།
བློ་གྲོས་རིག་འཛིན་འདུས་པའི་རྩལ་དུ་ཤར།།
སྐུ་གསུམ་བསྟན་པའི་རྒྱལ་མཚན་འདེགས་མཛད་པ།།
རྩ་གསུམ་རྒྱ་མཚོའི་སློབ་དཔོན་ཁྱེད་ལ་བསྔགས།།
བརྒྱུད་གསུམ་བླ་མས་བྱིན་རླབས་དངོས་གྲུབ་ཐོབ།།
མཆོག་གསུམ་དམ་པའི་བརྟུལ་བཞུགས་མཐར་ཕྱིན་པས།།
གནས་གསུམ་མཁའ་འགྲོའི་ཕྱག་རྒྱས་བདེ་ཆེན་གར།།
རོལ་མཛད་སློབ་དཔོན་ཆེན་པོར་རྒྱལ་གྱུར་ཅིག།
བློ་གྲོས་ཆོས་ཀྱི་ཉི་མ་ཀུན་ཏུ་གསལ།།
བྱམས་བརྩེའི་ལེགས་པའི་ཟླ་བ་མཆོག་ཏུ་བཟང།།
དོན་གྲུབ་དགེ་བའི་སྐར་མ་ཤིན་ཏུ་མཛེས།།
འཇིག་རྟེན་མུན་པའི་བསྐལ་བ་རབ་ཏུ་བསལ།།
འཇིགས་མེད་བློ་གྲོས་གཟུངས་སྤོབས་ཏིང་འཛིན་རྒྱས།།
ཞི་བདེའི་འོད་སྟོང་འཕྲོ་བའི་ཕྲིན་ལས་ཉིད།།
ཀུན་གསལ་ཁྱོན་ཀུན་ཡོངས་སུ་ཁྱབ་གྱུར་ནས།།
གསང་ཆེན་བསྟན་པའི་བདག་པོར་ཞབས་བརྟན་ཤོག། ཅེས་དང་།
དངོས་རིག་ལས་ཀྱི་ཕྱག་རྒྱ་ཁབ་ཏུ་སོན།།
བདེ་ཆེན་དོན་གྱི་ཕྱག་རྒྱར་རྟག་ཏུ་འགྲོགས།།
བཞེད་དོན་ལྷུན་གྲུབ་གསང་ཆེན་བསྟན་པའི་དཔལ།།
འཛིན་སྐྱོང་སྤེལ་བའི་སྐྱབས་མགོན་རྒྱལ་གྱུར་ཅིག། ཅེས་དང་།
ཨེ་མ་ཧོ། གསང་གསུམ་མཁའ་འགྲོའི་དེ་ཉིད་བདེ་ཆེན་ངོ་བོ།།
རང་བཞིན་བཅོས་མིན་སྟོན་པའི་མངོན་གྱུར་སློབ་དཔོན།།
སྣ་ཚོགས་སྒྱུ་འཕྲུལ་རོལ་བའི་ཐབས་ཤེས་མཇལ་ཚེ།།
ཡབ་ཡུམ་འབྲལ་མེད་ཀུན་བཟང་ཞིང་དུ་སྨོན་ནོ།། ཞེས་དང་། མཁས་པ་ཆེན་པོ་མཁན་པོ་འཇུ་བསྟན་སྐྱོང་མཆོག་གིས།
འཇིགས་མེད་དགྱེས་རོལ་བརྟུལ་ཞུགས་གར་གྱིས་མཛེས།།
དྲི་མེད་བློ་གྲོས་གཟུངས་སྤོབས་ནོར་གྱིས་མཛེས།།
ངེས་གསང་རྒྱལ་མཚན་ཕྲིན་ལས་དཔལ་གྱིས་མཛེས།།
ཟུང་འཇུག་བདེ་བ་ཆེན་པོར་རྟག་བརྟན་ཤོག། ཅེས་དང་། རྫ་མཁན་པོ་ཚེ་རིང་བཀྲ་ཤིས་ཀྱིས།
རིག་འཛིན་གྱི་བུ་རྒྱུད་ཀློང་གྲོལ་གྱི་སྐྱེས་བུས།།
ཟང་ཐལ་གྱི་མཁའ་ལ་གུ་ཡངས་ཀྱིས་རྩེན་གྱིན།།
ཡབ་མེས་ཀྱི་ཚངས་སྐུད་ཆེ་རྟགས་སུ་འཆང་བར།།
གནས་གསུམ་གྱི་ཌཱཀྐིས་ཨ་ཧོ་རང་ལོས་ཡོད།།
ལྷོ་མོན་གྱི་སྦས་ཕུག་པདྨ་ཡི་གསང་ལམ།།
རང་བྱུང་གི་སྨན་ལྗོངས་ལྷ་ཡུལ་གྱི་ཐེམ་སྐས།།
རྟེན་འབྲེལ་དང་ལས་སྨོན་མཐུན་ཕྱོགས་སུ་འཛོམས་པར།།
རིག་འཛིན་གྱི་ལྷ་ཚོགས་རྒྱང་རིང་ནས་དགྱེས་སྐད།།
རྩ་རྒྱ་ཡི་དྲ་བ་ལུས་རྒྱ་ཡིས་དཀྲོལ་ཏེ།།
ལུས་སྐྱེས་ཀྱི་བདེ་བས་བདེ་མཆོག་ལ་སྦྱོར་བའི།།
ཡང་གསང་གི་ཉེ་རྒྱུའི་འཕོ་མེད་ཀྱི་རྟེན་འབྲེལ།།
ཐོགས་བྲལ་གྱི་ངང་ལ་ཁྱུང་ཆེན་བཞིན་འཕུར་ཅིག། ཅེས་དང་། མཁན་སྤྲུལ་ཨོ་རྒྱན་ཉི་མ་མཆོག་གིས།།
སྦས་ཡུལ་མཁའ་འགྲོའི་ཕྱག་རྒྱ་སྐུ་ལ་འཁྱུད།།
འཇིགས་མེད་སྨྲ་བའི་ཕྱག་རྒྱ་གསུང་ལ་རྫོགས།།
བདེ་སྟོང་དོན་གྱི་ཕྱག་རྒྱ་ཐུགས་ལ་འབར།།
བརྟུལ་ཞུགས་རིགས་པའི་རྒྱལ་པོ་ཁྱེད་ལས་སུ།།
གནས་གསུམ་མཁའ་འགྲོའི་སྙིང་སྡུག་དཔའ་བོ་ཆེ།།
བརྒྱུད་གསུམ་བླ་མའི་གདམས་ངག་མཛོད་དང་ལྡན།།
ས་གསུམ་མུན་སེལ་ངེས་དོན་ཆོས་ཀྱི་རྗེ།།
སྐུ་ཚེ་བརྟན་ཅིང་བཞེད་དོན་ལྷུན་གྲུབ་ཤོག། ཅེས་དང་། མཁན་ཆེན་སངས་རྒྱས་ཆོས་འཕེལ་གྱིས།
རབ་འབྱམས་རྒྱལ་བའི་སྤྱི་གཟུགས་ཨོ་རྒྱན་རྗེའི།།
བསྟན་པའི་སྣང་བྱེད་ལུང་རྟོགས་རྒྱ་མཚོའི་བདག།
འཇིགས་མེད་སྨྲ་བའི་ཉི་མ་འོད་པོ་ཆེ།།
བསྟན་འཛིན་རྒྱུ་སྐར་ཁྲོད་ན་རྣམ་པར་གསལ།།
ཕུལ་བྱུང་བློ་གྲོས་འཛིན་མའི་ལྟོ་བ་རུ།།
བཀའ་གཏེར་ཆོས་ཀྱི་རྒྱ་མཚོ་ཡོངས་རྫོགས་པ།།
གང་ཁྱོད་བླུན་པོ་ནོར་གྱིས་བཀུར་བ་ཡི།།
བསྟན་འཛིན་གཟུགས་བརྙན་འབུམ་གྱིས་བསྒྲུན་དུ་མེད།།
སྒྱུ་མའི་ནོར་གྱི་སྐྱལ་བ་ཁུར་མིན་ཡང་།།
གང་དུ་བཞུགས་ཀྱང་ཀུན་ཀྱང་ཟིལ་གྱིས་གནོན།།
ཕུལ་བྱུང་ལེགས་པར་བཤད་པའི་ཆ་ཤས་རེས།།
མཁས་དགུའི་ཡིད་ཀྱི་བརྟན་པ་ཤུགས་ཀྱིས་དྲངས།།
མཁའ་སྤྱོད་མཁའ་འགྲོའི་ཚོགས་རྗེ་ཚོགས་ཀྱི་བདག།
སྒྲུབ་བརྒྱུད་གྲུབ་པའི་རིག་འཛིན་རྨད་པོ་ཆེ།།
བདེ་ཆེན་ཌཱཀྐི་དགྱེས་པའི་གྲོགས་དང་བཅས།།
ཞབས་པད་རྡོ་རྗེའི་ཁམས་སུ་བརྟན་གྱུར་ཅིག།
ཅེས་སོགས་རིགས་པའི་གྲོགས་པོ་གང་མང་ཞིག་གིས་བོད་དབྱིན་གཉིས་ཐོག་ནས་དགྱེས་བརྩེའི་མཚམས་འཕྲིན་གྱི་ཆར་དབབ་པ་ཡང་། མེ་བྱུང་བའི་སྔ་རོལ་དུ་དུད་པ་བྱུང་བ་ལྟར། དབང་གི་ཕྲིན་ལས་གྲུབ་པའི་རྟེན་འབྲེལ་གྱི་སྒོ་ཐོག་མར་ཕྱེས་པའི་རྟགས་སུ་སྣང་ངོ་ཞེས་སྒྲ་དབྱངས་རྒྱ་མཚོའི་གླིང་གི་ཁོར་ཡུག་དུ་འབྲུག་ལྟར་གྲག་པར་གྱུར་ཏོ།། སརྦ་མངྒ་ལཾ།། །།

ལོ་སར་གྱི་སྐབས་སུ་རང་ཉིད་ས་མཐར་ཡོད་པ་རྟོགས།
སྐབས་འདིར་རང་ཉིད་ཁེར་རྐྱང་ཡིན་པ་གཞི་ནས་ཤེས།
བསམ་གཞིག་ཤུགས་ཀྱིས་བཏང་དུས།
རང་ཉིད་མནར་གཅོད་རྒྱུན་རིང་ཞིག་གིས་མནར་བ་རྟོགས།
ག་ལེར་བསམ་དུས།
ལོ་སར་ངོ་མ་ནི་ལྷད་མེད་ཀྱི་བརྩེ་དུང་ལ་རེ་འདོད་ཀྱི་འབྲས་བུ་སྨྲིན་པ་དེ་ཡིན་པ་ཤེས།
ལོ་སར་སྐབས་སུ་ངེས་བར་དུ་དགོད་དགོས་པ་ཨེ་ཡིན་ན།ལོ་སར་གྱི་སྐབས་སུ་ངེས་བར་དུ་སེམས་ནས་དགའ་དགོས་པ་ཨེ་ཡིན་ན། གལ་ཏེ་དེ་འདྲ་ཞིག་ཡིན་ན།
བརྩེ་དུང་གིས་ཕམ་མཁན་ཞིག་ལ་མཚོན་ན་ནམ་ཡང་ལོ་སར་མེད་པ་འདྲ། ཟ་རོགས་འཐུང་རོགས་ཚོའི་ངོ་ལ་བལྟ་བཞིན་ཟོལ་བཅོས་ཀྱི་འཛུམ་རེ་བསྟན་ཆོག་ཀྱང་། དེ་ནི་ཟོལ་བཅོས་ཡིན་པས་དེའང་སྡུག་བསྔལ་གྱི་ཁ་སྣོན་ཞིག་རེད། ང་ལ་ནམ་ཡང་སྤྲོ་སྐྱིད་ཀྱི་ལོ་སར་མེད།

དྲན་པའི་སེམས་ངོགས་ནས་ཡལ་བ་མེད་པའི་སེམས་སོང་མ།
ཁྱོད་ནི་མེ་ཏོག་བཞིན་།
སད་ཀྱིས་བཅོམ་མི་ཐུབ་པའི་མེ་ཏོག་བཞིན།
རྟག་བརྟན་གྱི་མེ་ཏོག་ཅིག
ངའི་སེམས་ནས་ཡལ་མི་སྲིད་པའི་མེ་ཏོག་ཅིག་ཡིན།
ཇི་སྲིད་བར་དུ
ང་ཁྱོད་ལ་དགའ

བུམ་བཟང་ཡོ་རོབ་ལ་སོང་ནས་ལོ་ལྔ་འགོར་སོང༌། ཁོའི་སེམས་སུ་རང་གི་མི་ཚེའི་ནང་གི་ཆེས་ནོར་མི་ཉན་པ་ནི་ཚེ་གཅིག་གི་སྐྱ་ཡ་ འཚོལ་རྒྱུ་དེ་རེད་སྙམ། ཁོས་བོད་མོ་ཞིག་ཆུང་མར་ལེན་རྒྱུ་ནི་རྩ་བའི་ཐག་གཅོད་རེད། ཉིན་ཞིག་གྲོགས་པོ་ཞིག་གིས་ཁ་པར་གྱི་ལམ་ནས་ཁོ་ལ་བོད་མོ་སྙིང་རྗེ་བོ་ཞིག་ མཚམས་སྦྱོར་བྱས། ཁོས་ཀྱང་དེང་རབས་གློག་ཀླད་དྲྭ་ངོས་ནས་བུ་མོ་དེ་དང་ཁ་བརྡ་གང་མང་བྱས་པས་རིམ་ བཞིན་ཁོ་གཉིས་ཀྱི་སེམས་ཐག་ཇེ་ཉེ་ནས་ཇེ་ཉེར་གྱུར། དེ་ལྟར་ལོ་གཅིག་འགོར་བའི་རྗེས་ནས་བུམ་བཟང་གིས་ལོ་གཅིག་གི་དགོངས་པ་ཞུས་ཏེ་ བུ་མོ་དེར་ཐུག་པར་རྒྱ་གར་ལ་ཡོང་བ་རེད། བུ་མོ་དེའི་མིང་ལ་འབྲུག་མོ་ཟེར། ཁོ་རྒྱ་གར་ལ་འབྱོར་རྗེས་འབྲུག་མོ་དང་ཁོ་གཉིས་རྒྱ་གར་གྱི་ས་ཆ་གང་ཡིན་སར་ འཁྱམས་ཏེ། རྒྱ་གར་ལྷོ་ཕྱོགས་རྒྱ་མཚོའི་འགྲམ་རྒྱུད་ནས་བྱང་ཕྱོགས་ལ་དྭགས་རྒྱལ་ས་གླེས་ བར་དུ་སྤྲོ་སྣང་གིས་འཁྱམས། འབྲུག་མོ་ཁོ་ལ་དགའ་བའི་རྣམ་པ་དེས་བུམ་བཟང་གི་ཡིད་དགའ་ཞིང་ཕོ་གསར་གཞན་པ་ཚོ་ སྨོན་པ་སྐྱེ་བའི་ཚད་དུ་སླེབས། མ་གཞི་ནས་འབྲུག་མོའི་དཀར་གཙང་གི་ཞལ་རས་ལ་ཡིད་དུ་འོང་བའི་མིག་ཟུང་གིས་བརྒྱན་ ཞིང༌། ཕྲ་ཞིང་དྲང་བའི་སྐྱེས་གཟུགས་ལ་འབུར་དུ་ཐོན་པའི་འོ་འཛིན་གྱིས་བརྒྱན་པས་སྟག་ ཤར་སུ་ཞིག་གིས་མཐོང་ཡང་སྨོན་པ་ངང་གིས་སྐྱེ། ཁོ་གཉིས་ཀའི་ལྷན་དུ་ལོ་ཕྱེད་ཅིག་གི་དུས་ཚོད་དགོད་སྒྲ་དང་སྤྲོ་སྣང་གིས་ བསྐྱལ། བུམ་བཟང་གིས་ག་རེ་ལབ་ཀྱང་འབྲུག་མོས་ཁོའི་ཁ་ལ་ཉན་རྐྱང་བྱེད་ལ། མཚམས་ལན་རེ་བུམ་བཟང་ཡར་མར་ལ་རྩེད་མོ་རྩེད་དུ་སོང་ནས་ཉིན་རེ་ཟུང་ལ་ནང་ལ་མ་ ཡོང་རུང་མོས་རྙོག་དྲ་མི་བཤད་པས་མི་ཚང་མས་མོའི་གཤིས་ཀ་ལ་བསྟོད་པ་དང་ཡིད་ སྨོན་བྱེད།

ཉིན་ཞིག་བསམ་ཡུལ་ལས་འདས་པའི་དོན་དག་ཅིག་བྱུང་བ་ནི་བུམ་བཟང་གི་ཕྱིར་བསྐྱོད་ ལག་དེབ་བརླགས་ཚར་བ་དེ་རེད། དོན་དག་དེའི་ཆེད་དུ་དགོང་མོ་དེར་བུམ་བཟང་ལས་འབྲུག་མོ་ལ་སེམས་ཁྲལ་ཆེན་པོ་ བྱུང་སྟེ་མཚན་གང་བོར་གཉིད་སྐྱིད་པོ་ཞིག་གཏན་ནས་མ་ཡོང༌། ཁོ་གཉིས་གས་ཇི་ལྟར་བཙལ་ཡང་གཏན་ནས་མ་རྙེད་མོད། བུམ་བཟང་གིས་ཡང་བསྐྱར་ལག་དེབ་གསར་བཟོ་བྱས་ན་བཟང་བའིསྐོར་འབྲུག་མོ་ལ་གྲོས་ བྱས་དུས་འབྲུག་མོ་སྔོན་ཆད་དང་མི་འདྲ་བའི་ཚོར་སྣང་ཞིག་བུམ་བཟང་གི་སེམས་ལ་ཡང་ ཡང་ལྷུང༌། དེ་ལྟར་ཉིན་རེ་ནས་ཉིན་རེར་ཁོ་གཉིས་ཀྱི་བར་ལ་རྩོད་པ་ཡང་ཡང་ཡོང་གི་ཡོད་པས་ཟླ་ གཅིག་ལས་མ་འགོར་བར་ཁོ་གཉིས་རང་རང་གི་སར་གྱེས་པ་རེད། བུམ་བཟང་གིས་ཁང་མིག་ཆུང་ཆུང་ཞིག་གླས་ཏེ་རྡ་སར་བསྡད་ཅིང་འབྲུག་མོ་རྒྱ་གར་ གྱི་རྒྱལ་ས་ལྡི་ལི་ལ་འགྲོ་སོང༌། ཉིན་ཞིག་གི་ཞོགས་པ་མི་ཞིག་གིས་བུམ་བཟང་གི་ཁང་བའི་སྒོ་བརྡུང་བྱུང་བས་ཁོ་ཡར་ ལངས་ཏེ་སྒོ་ཕྱེས། སྒོ་རྡུང་མཁན་ནི་པད་མ་གཡུ་སྒྲོན་རེད། མོས་བྱབྱའདི་ཁྱོད་ཀྱི་ཡིན་པ་འདྲ། སྟེང་ན་ཁྱོད་རང་གི་པར་ཞིག་འདུག ཉེ་སྔོན་འབྲུག་མོའི་ང་ཚོ་ལ་སྤྲད་པའི་གྱོན་གོས་དེ་དག་གི་གཅིག་གི་ཁུག་མའི་ནང་ ན་འདུག གཅིག་ཐེངས་ན་ཁྱོད་ལ་དགོས་མཁོ་ཅན་ཞིག་ཡིན་ངེས། སྐྱབས་བཅོལ་ལག་དེབ་འདྲ་བོ་ཞིག་འདུག སྐྱབས་བཅོལ་ལག་དེབ་བཟོ་ན་དེང་སྐབས་ཁྲི་ཁ་ཤས་དགོས་ཀྱི་འདུག་བྱབྱཟེར། ཞེས་ཁོའི་བོར་ཟིན་པའི་ཕྱིར་བསྐྱོད་ལག་དེབ་ཟླ་བ་གཡུ་སྒྲོན་གྱིས་ཁྱེར་ནས་ སླེབས་སོང༌། ཁོས་གློ་བུར་དུ་ལན་ཅི་ཞིག་རྒྱག་དགོས་པའང་མ་ཤེས་པར་མོ་ལ་ཐུགས་རྗེ་ཆེ། འདི་ངའི་རེད། འདི་ཁྱོད་ལ་རྔན་པ་ཡིན་ཞེས་ཧིན་སྒོར་ལྔ་སྟོང་མོ་ལ་སྤྲད། མོ་གློ་བུར་དུ་ཧང་སངས་ནས་བྱབྱམི་དགོས། དངོས་པོ་དེ་ཁྱོད་ལ་གལ་ཆེན་པོ་ཡིན་ས་རེད། དེས་ན་འགྲིག་སོང་བ་རེད། ངས་ཏོག་ཙམ་མིན་ན་གད་སྙིགས་སུ་གཡུགས་ཚར་བ་ཡིནབྱབྱ ཞེས་ཕྱིར་འཁོར། བུམ་བཟང་མོའི་རྗེས་ལ་བརྒྱུགས་ཡོང་ནས་བཙན་གྱིས་སྒོར་ལྔ་སྟོང་དེ་མོ་ལ་སྤྲད་ ནས་བྱབྱཐུགས་རྗེ་ཆེབྱབྱ་ཟེར་བཞིན་ཕྱིར་ནང་ལ་བུད་སོང༌། གཡུ་སྒྲོན་ནང་ལ་ཡོང་ནས་བསམ་བློ་ཞིག་བཏང་དུས་མོའི་ཡིད་ལ་བུམ་བཟང་གི་ཡ་རབས་ སྤྱོད་བཟང་དང་ལྷད་མེད་ཀྱི་ཕན་སེམས་སོགས་ཤར་ནས་རིམ་བཞིན་བུམ་བཟང་མོའི་སེམས་ ཀྱི་ཟབ་སར་འཛུལ། དེ་ནས་མོས་བུམ་བཟང་མཐོང་ཐེངས་རེར་དོགས་མི་བདེ་བའི་རྣམ་པ་དེས་མོའི་སེམས་སུ་ ཅི་ཞིག་བཤད་འདོད་ཡོད་པ་བུམ་བཟང་གིས་ཀྱང་ཚོར། ཉིན་ཞིག་བུམ་བཟང་གིས་སྤོབས་པ་ཆེར་བསྐྱེད་ཀྱིས་མོ་ནང་ལ་སྐད་བཏང་སྟེ་ཁོ་གཉིས་ ཀའི་ཁ་བརྡ་གང་མང་ཞིག་བྱས་མཐར་གཉིས་ཀའི་ཕན་ཚུན་ལ་བཤད་མི་ཐུབ་པའི་གསང་བ་གཅིག་ མཚུངས་ཡིན་པས་ལྷད་མེད་ཀྱི་དུང་སེམས་ཀྱང་གཅིག་ཏུ་འདྲེས། དེ་ནས་ཟླ་གཅིག་གི་རྗེས་སུ་ཁོ་གཉིས་ཀྱི་ཆང་ས་བརྒྱབ་སྟེ་ཚེ་གཅིག་གི་གཏན་ གྲོགས་སུ་གྱུར། བུམ་བཟང་ཡང་ཕྱིར་ཡོ་རོབ་ལ་འགྲོ་བར་ཐག་མི་རིང་བས་གཡུ་སྒྲོན་གྱི་མིག་ཆུའི་ སྐྱེལ་མ་དང་བཅས་རྡ་ས་ནས་ལམ་ལ་བུད་དེ་ལྡི་ལི་ལ་ཆས། ཁོ་ལྡི་ལི་ནས་མ་ཅིག་ཏྲེ་ལ་རུ་སོང་ནས་ཞི་བདེ་གསར་བའི་ཐོག་བརྩེགས་གཉིས་པར་ཁང་ མིག་ཅིག་གླས་ཏེ་བསྡད། ཉིན་དེའི་དགོང་མོར་ཁོ་ཨ་མ་ཟ་ཁང་དུ་སོང་ནས་དགོང་ཟས་ཤིག་མངགས་ནས་འདུག་སྐབས། ཏག་ཏག་འབྲུག་མོ་ཨ་རི་ན་ཡོད་པའི་ཁོའི་ངོ་ཤེས་གྲོགས་པ་ཞིག་དང་ལྷན་དུ་ཟ་ཁང་ནང་ ལ་འཛུལ་བྱུང་བས། ཁོསབྱབྱཨེ་བློ་བཟང་སྐྲ་རིང་བྱབྱཞེས་ལག་པ་བཀྱགས་ནས་སྐད་བཏང་སྟེ་ཁོ་ཚོ་མཉམ་ དུ་ཅོག་ཙེ་གཅིག་གི་སྒང་ལ་འཛོམས་ནས་ཟ་མ་ཟོས། བུམ་བཟང་གིས་རང་ཉིད་ཕྱིར་ཡོ་རོབ་འགྲོ་བ་ཡིན་ཚུལ་སོགས་གླེང་དུས། འབྲུག་མོའི་སེམས་ལ་ཅི་དྲན་འདི་དྲན་མེད་པར་ལུས་ཡོངས་ཚ་ལམ་ལམ་དུ་གྱུར། སྐབས་དེར་ཕྱི་ལོགས་ནས་བུ་མོ་ཞིག་ཡོང་ནས་བྱབྱཨ་རི་ནས་ཟླ་སྒྲོན་ཟེར་བ་ཞིག་ གིས་ཁྱོད་ཀྱི་མགྲོན་ཁང་ལ་ཁ་པར་སླེབས་བྱུང་མགྱོགས་པོར་ཤོག་བྱབྱཅེས་བློ་བཟང་ ལ་ལབ་བྱུང་བས་ཁོས་བྱབྱསུ་ཞིག་ཡིན་ནམ་ཁྱེད་གཉིས་སྡོད་དང་ང་མགྱོགས་པོར་ཡོང་ གི་ཡིནབྱབྱཟེར་བཞིན་བུད་སོང༌། འབྲུག་མོས་འཚབ་འཚུབ་ངང་བྱབྱཁྱོད་ཀྱི་གྲོགས་པོ་ལ་ཨ་རི་ན་གྲོགས་མོ་མང་པོ་ཡོད་ ས་རེད། ཁ་སང་ཡང་་་་་ཞེས་ཚིག་མཇུག་མ་རྫོགས་གོང་བུམ་བཟང་གིས་བྱབྱཟླ་སྒྲོན་ཁོའི་ཆུང་ མ་རེདབྱབྱ ཅེས་བཤད་བྱུང་བས་འབྲུག་མོ་དེ་བས་ཀྱང་ཚ་ལམ་ལམ་དུ་གྱུར། ཡིན་ནའང་མོ་བཙན་གྱིས་ལྷོད་ལ་བབ་སྟེ། ཚུར་བུམ་བཟང་གི་གདོང་ལ་བལྟས་ནས། བྱབྱབུམ་བཟང་ཁ་གྱེས་པ་ནས་ཁ་པར་གཅིག་ཀྱང་མི་ཡོང་ག དེ་འདྲའི་བསམ་བློ་མ་འཁུར་རོགས། མི་སུ་དང་སུ་ཞིག་ཡིན་ཡང་ནོར་འཁྲུལ་དང་ཁ་རྩོད་ཤོར་ཡོང་གི་རེད། འུ་གཉིས་ཁ་གྱེས་ཀྱང་ངའི་སེམས་སུ་སྔོན་གྱི་འུ་གཉིས་ཀའི་བརྩེ་དུང་ལ་གས་ཆག་ ཤོར་མེད། ཁ་སང་ངའི་གྲོགས་མོ་ཞིག་གིས་སྐྱེས་སྐར་སྒང་ནས་ཁོ་ངོ་ཤེས་པ་ཡིན། ཁོས་དེ་རིང་མཉམ་དུ་ཟ་མ་ཟ་རུ་འགྲོ་ཟེར་བས་ངེད་གཉིས་མཉམ་དུ་ཡོང་བ་ཡིན། མ་གཏོགས་གཞན་་་་བྱབྱབུམ་བཟང་གིས་མྱུར་དུ་བྱབྱརེད་རེད། དེང་སྐབས་ཀྱི་ལུགས་སྲོལ་རེད།བྱབྱཅེས་ལན་སྟབས་བདེ་ཞིག་བརྒྱབ་ནས་མངར་ཆུ་ཞིག་ བླུགས་ཏེ་ཕར་མོ་ལ་སྤྲད། འབྲུག་མོའི་སེམས་ལ་ཁོས་ང་ལ་འཁོན་སེམས་འཛིན་གྱི་མེད་པ་འདྲ། ཕྱི་ལོགས་ནས་ཡོང་བའི་མི་དེ་འདྲ་ས་མི་འདུག་ཅེས་སྙམ་པའི་ཞོར་ལ་བརྩེ་འདང་ཞིག་ ཀྱང་ངང་གིས་སླེབས་ཏེ། བྱབྱཁྱོད་ཀྱི་ཕྱི་བསྐྱོད་ལག་དེབ་གང་ན་འདུག་བྱབྱཅེས་དྲིས་བྱུང་བས། བྱབྱཁྱོད་ཀྱིས་མཉམ་མ་བཞག་པར་གྱོན་གོས་རྙིང་བ་ཁ་ཤས་པདྨ་གཡུ་སྒྲོན་ལ་སྤྲད་ འདུག་ག དེའི་གཅིག་གི་ཁུག་མའི་ནང་ལ་འདུག་ཟེར། ཟླ་གཉིས་ཀྱི་སྔོན་ལ་མོས་ཁྱེར་ནས་ངའི་ནང་ལ་སླེབས་སོང༌། སྙིང་རྗེ་མོས་ལག་དེབ་སྟེང་གི་པར་ལ་བལྟས་ནས་ངའི་ཡིན་པ་ཤེས་པ་ཙམ་ལས་ཕྱི་ བསྐྱོད་ལག་དེབ་ཡིན་པ་ཤེས་མི་འདུགབྱབྱཅེས་བཤད། འབྲུག་མོས་ཨ་ཡ་མཚར་ང་འདི་ཐམ་མེ་འཐོམ་མེ་དེ་འདྲ་ག་འདྲ་ཡིན་ནམ། བྱབྱགཡུ་སྒྲོན་མ་གཞི་ནས་བུ་མོ་ཡ་རབས་ཡོད་པ་རེད་ངས་གཡུ་སྒྲོན་ལ་ཁ་པར་བཏང་ནས་ ཐུགས་རྗེ་ཆེ་ཞུ་རྒྱུ་ཡིནབྱབྱཞེས་བཤད་བཞིན་སྡེར་མའི་ནང་གི་བྱ་ཤ་དེ་ལས་གཅིག་ ཐུར་མས་བཟུང་ནས་ཁོའི་ཕོར་བའི་ནང་ལ་བཞག མོས་གཡུ་སྒྲོན་ལ་ཁ་པར་བཏང༌། བུམ་བཟང་ཡང་སྡོད་མ་ཚུགས་པར་གཙང་སྤྱོད་ལ་བུད་སོང༌། ཁོ་ཕྱིར་ཡོང་དུས་བློ་བཟང་ཡང་སླེབས་འདུག་མོད་སུ་གང་ལའང་ཅང་བཤད་རྒྱུ་མི་འདུག མཚམས་ཤིག་ནས་འབྲུག་མོའི་ཡིད་དུ་འོང་བའི་མིག་འདབས་ནས་མིག་ཆུ་འགའ་མཁུར་ཚོའི་ བརྒྱུད་དེ་བྲང་ཁར་ལྷུང༌།

དྲན་པའི་སེམས་ངོགས་ནས་ཡལ་བ་མེད་པའི་སེམས་སོང་མ།
ཁྱོད་ནི་མེ་ཏོག་བཞིན་།
སད་ཀྱིས་བཅོམ་མི་ཐུབ་པའི་མེ་ཏོག་བཞིན།
རྟག་བརྟན་གྱི་མེ་ཏོག་ཅིག
ངའི་སེམས་ནས་ཡལ་མི་སྲིད་པའི་མེ་ཏོག་ཅིག་ཡིན།
ཇི་སྲིད་བར་དུ
ང་ཁྱོད་ལ་དགའ

            ཕུ་ནུ་ཕ་ས་བསྐྱུར་ནས་ས་མཐར་འཁྱམས།།                    

                        དམིགས་བྱ་མ་འགྲུབ་ལོ་ཐོག་ཟླ་ཡིས་བརྩེགས།།

                                    སེམས་ཁམས་མ་བདེ་རྨི་ལམ་ཧ་ཅང་འཁྲུགས།།  

                                        རང་སེམས་རང་གིས་གསོ་བའི་སྙན་ངག་འབྲི།།

            རྒྱ་གར་ཉེན་རྟོགས་མི་སྣས་འདྲི་རྟོགས་རྒོད།།                 

                        སྐྱབས་བཅོལ་ལག་ཁྱེར་མེད་པས་སེམས་ཁྲལ་ཆེ།།

                                    སྐད་བརྡ་མི་འཕྲོད་སྒོར་མོས་ལས་ཀ་མང༌།།                                                       

    གནས་སྡོད་དཀའ་ངལ་ཆེ་བའི་སྙན་ངག་འབྲི།།

            འཇིག་རྟེན་བརྩེ་བའི་མནར་གཅོད་ཁུར་དུ་ལྕི།།              

                        འཚོ་བ་ཙག་ཙིག་འདི་ལ་འགྲོ་སོང་མང༌།།

                                    འཚོ་ལམ་རྣམ་གྲངས་མང་བའི་ས་མཐའ་ནས།།  

                                        རང་ཐག་རང་གིས་གཅོད་པའི་སྙན་ངག་འབྲི།།

            དམིགས་བྱ་མ་འགྲུབ་ཁྱིམ་ཐབ་མི་སྐྱོང་བའི།།

                        དམ་བཅའ་བརྟན་པོ་སྙིང་ན་ཡོད་ནའང༌།།

                             སེམས་མཐུན་མཛའ་མོའི་སྙིང་གཏམ་ཟློག་དཀའ་བས།།

                                        རྐྱེན་དབང་བར་ཆད་མང་བའི་སྙན་ངག་འབྲི།།

            སྤྱི་དོན་སྒྲུབ་པར་ནུས་པ་ཞན་ན་ཡང༌།།                         

                         རང་དོན་སྒྲུབ་པའི་བསམ་བློ་ང་ལ་མེད།།

                           གཞན་ཕན་སེམས་རྩ་བརྟན་པའི་སེམས་ངོགས་ནས།།  

                                                བསམ་བློ་ཁོ་ལག་རྒྱས་པའི་སྙན་ངག་འབྲི།།

            དུངས་བ་ཟབ་པའི་གྲོགས་ཚོགས་ཕྱོགས་སུ་གྱེས།།                       

                        འདོན་འདུན་བསམ་པའི་ངལ་བ་ཁུར་དུ་ལྕི།།

                           དམིགས་བྱར་འཚུབ་ཆ་རྒོད་པའི་འཇིག་རྟེན་ནས།།

                              འཆར་སྣང་རྦ་རླབས་འཁྲུགས་པའི་སྙན་ངག་འབྲི།།

            གཏན་བདེའི་ཐར་ལམ་སྙེགས་པའི་སྡོམ་ཁྲིམས་མེད།      

                        སྙིང་མཆིན་དྲོན་མོ་གླན་སའི་ཆུང་མ་མེད།།

                                    ས་ཆེན་འདི་ལ་བཞག་པའི་བྱས་རྗེས་མེད།།        

                                         དམིགས་བྱ་རི་ནས་རྒས་པའི་སྙན་ངག་འབྲི།།

            ཕྱི་ན་རང་བྱུང་ཚ་བས་འཇིག་པ་རྒོད།།                          

                        ནང་ན་ས་མཐའི་འཚོ་བའི་མནར་གཅོད་ལྕི།།

                                    ནམ་རྒྱུན་ཕ་ས་དྲན་པའི་གདུང་བ་ཆེ།།              

                                       ལུས་སེམས་ངལ་གསོ་བྲལ་བའི་སྙན་ངག་འབྲི།།

            དཔལ་འབྱོར་འཚོལ་སྒྲུབ་ཅི་ཙམ་དར་གྱུར་བ།།              

                        མགོ་སྐོར་སླུ་བྲིད་དེ་ཙམ་བྲིན་འགྱུར་བའི།།

                                    ད་ལྟའི་དུས་ལ་བློས་ཐུབ་གྲོགས་པོ་དཀོན།།        

                                        རང་གིས་རང་ཉིད་སྐྱོང་བའི་སྙན་ངག་འབྲི།།

            མཛེས་མའི་འཛུམ་ཆུང་དབྱར་གསུམ་མེ་ཏོག་འདྲ།།        

                        ལྐོག་གི་དམིགས་བྱ་དགུན་གསུམ་ཁ་བ་འདྲ།།

                                    ཁ་བ་སེམས་ལ་བབས་ན་གྲང་འགྱུར་བས།།

                                       རྒྱུས་ལོན་ཡིད་གཟབ་དགོས་པའི་སྙན་ངག་འབྲི།།

            ཨ་སྒོར་བབ་བརྩེགས་ཅན་ལ་གྲོགས་པོ་མང༌།།                

                        དབང་དང་ཐོབ་ཐང་ཅན་ལ་གཉེན་ཉེ་མང༌།།

                                    མི་རྟག་རྒུད་པའི་འཇབ་རྒོལ་བྱས་པའི་ཚེ།།        

                                        གྲོགས་མེད་ཁེར་རྐྱང་ལུས་པའི་སྙན་ངག་འབྲི།།

            གྲོགས་དང་ཕུ་ནུ་མེད་པའི་ས་མཐའ་ནས།།                    

                        ཁེར་རྐྱང་ལོ་ཟླའི་བང་རིམ་བགྲོད་པའི་ཚེ།།

                                    མཛའ་མོའི་སྙིང་གཏམ་ཚིག་གི་བདེ་ཚོར་གྱིས།།  

                                                མི་ཚེ་དྲོད་ཀྱིས་ཁེངས་པའི་སྙན་ངག་འབྲི།།

                                    ༢༠༠༦་༨་༠༩ ལ་འཕགས་ཡུལ་བྱང་ཕྱོགས་རྡ་རམས་ས་ལ་ནས།